Rama: Do krijohet një strukturë e posaçme për sportistët elitarë pranë Forcave të Armatosura

Kryeministri i Shqipërisë, Edi Rama, i ka përmendur emrat e shtatë sportistëve shqiptarë që kanë korrur suksese në arenën ndërkombëtare. Sipas tij, ministria e Mbrojtjes është duke përgatitur legjislacionin për krijimin e një strukture të posaçme për sportistët elitarë pranë Forcave të Armatosura, njofton Klan Kosova. Në mesin e këtyre emrave ndodhen edhe emrat e sportistëve nga Kosova.

1. Luiza GEGA, kampionia që i dhuroi Shqipërisë medalje ari në 3000 metra me pengesa në kampionatin Europian të Atletikës
2. Distria KRASNIQI, xhudistja e pamposhtur nga Kosova fitoi gjithashtu medaljen e artë në Lojërat Olimpike “Tokio 2020”
3. Nora GJAKOVA, xhudistja e cila fitoi medaljen e artë olimpike, në kategorinë deri në 57 kilogramë në Lojërat Olimpike “Tokio 2020”
4. Briken CALJA, u shpall kampion bote në peshën deri 73 kg, në Kampionatin Botëror të Peshëngritjes, në Uzbekistan në vitin 2021
5. Ilir KËLLEZI, një atlet i talentuar që ka nderuar vendin tonë me shumë medalje e kupa në gara e maratona ndërkombëtare
6. Ilirian SULI, një nga peshëngritësit më të suksesshëm të vendit tonë. Me mbi 100 rekorde kombëtare, është nënkampion bote në peshëngritje
7. Indrit ÇULLHAJ, xhudisti që mes sukseseve të shumta në arenën kombëtare, arriti të kurorëzohet si kampion Ballkani në vitin 2018

klankosova.tv