Rama: Prishtina është shtëpia e një skene të larmishme dhe të gjallë feministe

Kryetari i Prishtinës, Përparim Rama, ka përshëndetur edicionin e 11-të të FemArt "Kalle Tutën", i cili u përmbyll të hënën mbrëma me një performancë muzikore të Rina Kaçinarit, Carles Munoz Camarero dhe Jörg Mikula, si dhe nga kori Okarina. Rama, përmes një postimi në Facebook, tha se u përmbyll një javë arti ngazëlluese, me diskutime në panele dhe seminare nëpër ambiente në të gjithë kryeqytetin, duke shtuar se Prishtina është shtëpia e një skene të larmishme e të gjallë feministe. "Prishtina është shtëpia e një skene të larmishme dhe të gjallë feministe, me njerëz kreativë që na inkurajojnë të përpiqemi vazhdimisht për marrëdhënie më autentike në mbarë shoqërinë dhe na shtyjnë të punojmë drejt drejtësisë, barazisë dhe sigurisë publike; duke avokuar për hapësira gjithëpërfshirëse, përkrahëse dhe të guximshme, që u mundësojnë individëve të shihen, të afirmohen dhe të çmohen. Më shumë se kurrë, ne e pohojmë mbështetjen tonë për praninë e këtyre krijuesve, të cilët, me dashuri dhe përkushtim ua ngjallin kurajon dhe fuqinë zërave që dridhen për ta kallë tutën", ka shkruar Rama në Facebook. Rama e uroi drejtoreshën ekzekutive të ArtPolis-it për organizimin, transmeton Klankosova.tv " Tash 11 vjet organizatorja Zana Hoxha sjell talente ndërkombëtare dhe vendore në Kosovë, duke ndërthurur një program të mirëmenduar mbi përvojat e grave dhe të vajzave nga e gjithë bota. Urime Zanës dhe ArtPolis-it për këtë javë mbresëlënëse plot evente. Ju urojmë sukses dhe mirënjohje, të cilat ju i meritoni për punën e madhe që po bëni në Prishtinë e më gjerë", ka shtuar ai. Klikoni KËTU për t’u bërë pjesë e kanalit zyrtar të Klan Kosovës në Viber. Klikoni KËTU për ta shkarkuar aplikacionin e Klan Kosovës në Android, dhe KËTU për iOS