UEFA po heton akuza të rënda ndaj anësorit të Benficas, Gianluca Prestianni, se ai përdori një fyerje raciste ndaj yllit të Real Madrid, Vinícius Júnior, gjatë përballjes së tyre në Ligën e Kampionëve.

Sipas “ESPN”, Prestianni ka pranuar se përdori një fyerje homofobike ndaj Viníciusit, e jo një fyerje raciste.

Incidenti ndodhi në pjesën e dytë në “Estádio da Luz” të martën mbrëma, pak pasi Vinícius shënoi golin e vetëm të ndeshjes për Real Madridin.

Braziliani reagoi i zemëruar ndaj komenteve të Prestiannit, i cili kishte mbuluar fytyrën me fanellë. Vinícius njoftoi gjyqtarin, duke shkaktuar një ndërprerje prej 10 minutash.

Fillimisht, sulmuesi i Real Madridit e akuzoi argjentinasin 20-vjeçar për abuzim racist.

Megjithatë, burime thonë se Prestianni u ka thënë hetuesve të UEFA-s se ai përdori një fyerje homofobike në spanjisht, jo fjalën “mono” (që do të thotë majmun).

Shpjegimi thuhet se iu përcoll menjëherë pas ndeshjes mesfushorit të Madridit, Aurélien Tchouaméni.

Real Madridi ka dorëzuar atë që e përshkruan si një dosje të plotë provash në UEFA.

Sulmuesi Kylian Mbappé deklaroi se dëgjoi abuzim racist ndaj bashkëlojtarit të tij në pesë raste të ndryshme gjatë ndeshjes, duke shtuar se edhe disa lojtarë të Benficas ishin të vetëdijshëm për komentet.

Mbappé kërkoi ndëshkim serioz, ashtu si edhe trajneri Álvaro Arbeloa, i cili dëshiron që UEFA ta bëjë këtë rast një pikë kthese në luftën e futbollit kundër diskriminimit.

Sipas Nenit 14 të rregullores disiplinore të UEFA-s, sanksionet për abuzim racist ose homofobik janë identike, duke parashikuar minimumi një pezullim prej 10 ndeshjesh ose një dënim ekuivalent.

Qoftë racist apo homofobik, qëllimi mbetet i njëjtë: të poshtërojë, të çnjerëzojë, të lëndojë. Zëvendësimi i një fyerjeje të rëndë me një tjetër nuk është lehtësim, as sqarim – është pranim. Të thuash “nuk ishte racist, por homofobik” nuk përbën mbrojtje. Kjo paraqet të njëjtën tablo shqetësuese të një profesionisti të ri që mendon se urrejtja është e pranueshme si reagim i momentit.

Në nivelin elitar, padija nuk është justifikim. Futbolli ka ecur përpara – dhe kush nuk ka ecur me të, nuk duhet të ketë vend në të./GazetaExpress/