Rasti i vdekjes së 67-vjeçares në Dragash, aktakuzë ndaj kunatës e nipit (VIDEO)

Fshatarët e Kukit të Dragashit pasditën e së martës i dhanë lamtumirën e fundit Saime Demuzit, që vdiq herët të hënën në rrethana të pasqaruara. Dyshimet u shtuan kur stafi mjekësor shkoi ta konstatojë vdekjen e 67-vjeçares që s'kishte shëndet të qëndrueshëm mendor. Pikëpyetjet u shtuan pasi edhe muajin e kaluar e moshuara që jetonte me gruan e vëllait dhe nipin, ishte mbajtur në kushte aspak të mira nga ta, njofton Klan Kosova. Megjithatë dhunën fizike e mohuan të afërmit, kur u vizituan nga Qendra për Punë Sociale atë ditë. Andaj, vëllai tjetër i saj në pamundësi për ta mbajtur motrën ofroi një pagesë mujore që e ktheu atë në shtëpinë e nipit. Për rastin e nëntorit Prokuroria Themelore në Prizren ka ngritur aktakuzë më 21 dhejtor ndaj kunatës N.A. dhe nipit J.A. për dhunë psikologjike ndaj viktimës. E për rastin e vdekjes do veprohet pasi të zbardhet raporti i obduksionit nga Mjekësia Ligjore. https://www.youtube.com/watch?v=z38O9ee6d2Y