Regjistrohet rritje e infeksionit me COVID-19 në Gjilan, apelohet për respektim të masave

Komiteti për menaxhimin dhe parandalimin e përhapjes së COVID-19, nën udhëheqjen e nënkryetarit të Gjilanit, Arbër Ismajli, ka mbajtur takimin për vlerësimin e situatës për dy ditët e fundit. Ismajli tha se kemi një rritje të infeksionit në Gjilan ditëve të fundit, duke shtuar se kjo dëshmon që virusi është prezent, përcjellë Klan Kosova. “Kemi një rritje të ndjeshme të rasteve të reja pozitive dhe kjo dëshmon se virusi është ne mesin tonë. Andaj, apeloj qytetarët dhe bizneset që japin shërbime që të vazhdojnë t’i respektojnë masat, vendosjen e maskës dhe mbajtjen e distancës”, ka thënë Ismajli. Pasqyra e përgjithshme në Gjilan që prej fillimit të pandemisë është si vijon: Nga 12479 mostra, 3773 kanë rezultuar pozitivë, 3464 janë shëruar, 111 qytetarë e kanë humbur betejën me virusin, 200 raste janë aktive, të hospitalizuar me COVID janë 28 persona dhe 212 mostra në pritje për rezultat. Ndryshe, në këtë takim u bë e ditur se është shqetësues fenomeni i ditëve të fundit i ndezjes së maleve në Gjilan, derisa janë apeluar qytetarët që të mos vazhdojnë me këto akte të shëmtuara, përndryshe në momentin që identifikohen do të ballafaqohen me organet e drejtësisë.