Rossi: Në vitin 2016 synoj të përsëris sezonin e shkuar

Valentino Rossi nuk dorëzohet edhe pose ishte shumë pranë titullit të dhjetë gjatë sezonit të shkuar duke e humbur vendin e parë të klasifikimit në javën e fundit. 37-vjeçari i largon zërat për një lamtumirë të mundshme për të tentuar sërish suksesin në Moto GP gjatë vitit 2016. “Doktori” i hedh pas krahëve polemikat e sezonit të shkuar dhe në një intervistë për “Autosport” ai thekson se do të tentojë përsëri ta fitojë titullin e dhjetë të karrierës. “Vitin e ardhshëm mund të garoj me të njëjtin ritëm por duhet të jem shumë i motivuar. Një peshë të madhe do të ketë edhe marrëdhënia ime me Yamahan e gomat Michelin”, thekson motoçiklisti nga Pesaro. Gjatë sezoneve 2014-2015 ai u shpall fitues në 6 gara, ndërsa në 4 sezonet paraardhëse kishte arritur të fitonte vetëm tre, çka do të thotë se mosha mbi supet e tij nuk peshon. “Nuk ka ndonjë ndryshim të madh mes moshës 36 dhe 37. Nuk jam aspak i shqetësuar sepse besoj shumë që vitin e ardhshëm mund të regjistroj të njejtat suksese”, thekson piloti i Yamahas që premton se sezoni 2016 do të jetë një tjetër histori. Ndërkohë, drejtori i përgjithshëm i skuadrës Yamaha, Lin Jarvis, shprehet se skuadra është e vetëdijshme për konfliktet e vazhdueshme mes Rossit dhe Lorenzos, por ai thekson se ata janë të dy pilotë të mëdhenj, prandaj ata duhet të shikojnë vetëm përpara. /supersport.al