Rrahja në Viti: Katër të lënduar, tre në pranga (VIDEO)

Shenja gjaku ka në disa pjesë të rrugës “Flaka e Janarit” në Viti. Ato mbetën nga një përleshje ku u përdorën mjete të mprehta e si rrjedhojë katër persona mbetën të lënduar. Kurse tre nga pesë të dyshuarit u arrestuan. Jo zyrtarisht televizioni ka marrë vesh se përleshjes të së premtes i kishte paraprirë një tjetër ku dy djemve që aktualisht gjenden në arrati u ishte sulmuar një familjar i tyre. Të njëjtit kishin lënë takim pranë shkollave të mesme për t'i qëruar hesapet me tashmë të lënduarit. Drejtori i Gjimnazit "Kuvendi i Lezhës", Mujë Tafa, tha se vetëm njëri nga të përfshirët ishte nxënës në shkollën që drejton, të tjerët jo. Këtë nuk e konfirmuan nga Prokuroria Themelore në Gjilan, vetëm bënë me dije se janë ndaluar dy të mitur e një i rritur. “Është parashtruar kërkesa për caktimin e masës së paraburgimit. Ndërsa sa i përket personave të arratisur janë duke u ndërmarr të gjitha veprimet hetimore në  zbulimin e vendndodhjes së tyre.” tha Gentiana Fejzullahu nga Prokuroria Themelore në Gjilan. Tre nga të lënduarit po trajtohen në Qendrën Klinike Universitare të Kosovës dhe janë jashtë rrezikut për jetë teksa i katërti është ndaluar në spitalin e Gjilanit. Rasti nga policia është cilësuar si “Vrasje në tentativë” dhe “Pjesëmarrje në rrahje”. https://www.youtube.com/watch?v=FcXTWc82g2k