Rrëmbimi në Veternik, katër të ndaluar - mes tyre edhe një polic

Katër persona, përfshirë një zyrtar policor, janë ndaluar si të dyshuar për përfshirje në rastin e rrëmbimit të ndodhur më 19 shtator të këtij viti në lagjen Veternik të Prishtinës, duke e çuar në tetë numrin e përgjithshëm të të arrestuarve. Sipas njoftimit zyrtar, Inspektorati Policor i Kosovës në bashkëpunim me hetuesit e Njësisë së Hetimeve të Përgjithshme në Prishtinë kanë arritur të sigurojnë prezencën e personave të dyshuar, derisa gjatë veprimeve hetimore janë sekuestruar një armë zjarri dhe një lodër (imitim i armës AK-47). Me vendim të Prokurorisë Themelore të Prishtinës, të katër personave të ndaluar u është caktuar masa e ndalimit prej 48 orësh. Tutje bëhet e ditur se si pjesë e procedurave administrative, IPK i ka rekomanduar Policisë së Kosovës edhe suspendimin për zyrtarin policor. "Hetuesit policor dhe ata të IPK-së, në koordinim të plotë me Prokurorinë Themelore, po vazhdojnë veprimet e mëtejme hetimore me qëllim të ndriçimit të plotë të rastit. Numri i përgjithshëm i personave të arrestuar lidhur me këtë rast arrin në tetë". Rrëmbimi ndodhi mbrëmjen e së enjtes në Veternik të Prishtinës. Sipas policisë, dy të dyshuar kanë marrë me forcë viktimën duke e futur në veturë, derisa sipas viktimës, ata e kanë dërguar në një shtëpi të pabanuar ku e kanë mbajtur deri në mëngjes, dhe dyshohet se ndaj tij është përdorë forcë fizike./Klankosova.tv https://klankosova.tv/veternik-arrestohen-dy-burra-rrembyen-nje-tjeter-dhe-perdoren-force-ndaj-tij/