Rreth 50 krime të rënda s'u gjykuan, mbi 12 mijë raste u parashkruan për 5 vjet (VIDEO)

Mbi 12 mijë raste u parashkruan vetëm gjatë 5 viteve të fundit në Kosovë. Saktësisht 12 mijë e 215 persona apo edhe më shumë të cilët shkelën ligjin, i shpëtuan dënimit për shkak se lënda e tyre u vjetërsua. Kështu vërtetohet nga mbledhja e të dhënave në pesë raportet që ka publikuar Këshilli Prokurorial i Kosovës, nga viti 2020. Vetëm në 2024-ën, u parashkruan gjithsej 2 mijë e 375 raste. Sipas raportit të KPK-së, në mesin e këtyre rasteve, ishin edhe 17 aktakuza që ishin ngritur nga Departamentet e Krimeve të Rënda të Prokurorive Themelore. Ndërkaq, gjatë atij viti vetëm një rast u parashkrua në fazën e hetimit. E numri më i madh i rasteve që u parashkruan në 2024-ën, ishin ato të Departamentit të Përgjithshëm. Sipas raportit të Këshillit Prokurorisë, gjykatat themelore morën vendime për parashkrim të 2 mijë e 357 aktakuzave të ngritura nga Departamentet e Përgjithshme të Prokurorive Themelore. Nga Departamenti i Përgjithshëm ishin gati të gjitha rastet të cilat u parashkruan në 2023-ën. Nga raportet e KPK-së, rezulton se atë vit, u parashkruan gjithsej 2050 raste, 2 mijë e 45 prej të cilave ishin aktakuza të ngritura nga Departamentet e Përgjithshme të Prokurorive Themelore. Ndërkaq, vetëm pesë nga të gjitha rastet të cilat u parashkruan gjatë 2023-ës, ishin lëndë për Krime të Rënda. Në 2023-ën, asnjë rast nuk u parashkrua në fazën e hetimit. Numri më i madh i rasteve të parashkrimit të lëndëve u regjistrua në 2022-ën. Atë vit, bazuar në raportin e Këshillit Prokurorial, u parashkruan 3 mijë e 80 raste. Dy prej këtyre rasteve u parashkruan qysh në fazën e hetimit. 3 mijë e 77 raste të cilat u parashkruan gjatë 2022-ës, ishin aktakuza të ngritura nga Departamentet e Përgjithshme të Prokurorive Themelore.  Ndërkaq, njëri nga rastet që u parashkruan në 2022-ën, lidhej me një aktakuzë të Departamentit të Krimeve të Rënda. Vjetërsim të krimeve të rënda pati edhe në 2021-ën. Sipas raportit të Këshillit Prokurorial të Kosovës, atë vit, Gjykatat Themelore vendosën për parashkrimin e 13 rasteve të Krimeve të Rënda. Në 2021-ën, 11 raste u parashkruan qysh në fazën e hetimit. Kurse, u parashkruan 2 mijë e 326 aktakuza të ngritura nga Departamentet e Përgjithshme të Prokurorive Themelore, duke e çuar kështu në 2 mijë e 350 numrin e rasteve të cilat u parashkruan në 2021-ën. E në 2020-ën, ishin vetëm 10 lëndë më shumë të cilat e vjetërsuan e u parashkruan. Në raportin e Këshillit Prokurorial të Kosovës, figurojnë gjithsej 2 mijë e 360 raste të parashkruan në atë vit. Mbështetur në të dhënat e këtij raporti, në mesin e lëndëve që u parashkruan ishin edhe 11 raste të krimeve të rënda. Ndërkaq, vetëm gjatë atij viti, 2 mijë e 331 raste u parashkruan lidhur me aktakuzat e prokurorëve të Departamenteve të Përgjithshme të Prokurorive Themelore. Në 2020-ën,18 raste u parashkruan qysh në fazën e hetimit. Mirëpo, në këto raporte nuk figuron ndonjë e dhënë për dëmin financiar që i është shkaktuar buxhetit të Shtetit nga të gjitha rastet të cilat janë parashkruar. Për këtë pyetje të emisionit nuk pati përgjigje as Këshilli Prokurorial i Kosovës. Detajet i gjeni në kronikën e përgatitur nga Kiks Kosova: https://www.youtube.com/watch?v=UaVbIKvzM04