Rrugëtimi 5-vjeçar i Vjosa Osmanit si presidente e Kosovës (VIDEO)

Vjosa Osmani, mori pozitën e presidentes së vendit më 4 prill të 2021, teksa sot ishte dita e saj e fundit në krye të vendit. Gjatë rrugëtimit të saj 5-vjeçar si e para e vendit, Osmani kishte takime të shpeshta në vende të ndryshme të botës, raporton KlanKosova.tv. Osmani gjatë mandatit të saj kishte raportuar se mori kërcënime në disa raste, teksa rrugëtimi i saj si presidente u zhvillua me ballafaqime edhe me ish aleatët e saj partiak si Donika Gërvalla me të cilën 'u thumbuan' me këngë të artistes Dafina Zeqiri. Ajo përfaqësoi vendin në OKB, teksa shpërfaqi masakrat e Serbisë në Kosovë në Këshillin e Sigurimit. Osmani kishte rol të madh në vitin e fundit të detyrës së saj si presidente, teksa vendi kaloi në një periudhë të gjatë të 'ngërçit politik'. Viti 2025 shënoi avancim në fushën e diplomacisë teksa Kosovës i erdhën tri njohje të reja nga Kenia, Sudani dhe Siria. Osmani gjatë përfaqësimit diplomatik u shfaq krah më krah me presidentin amerikan, Donald Trump për Bordin e Paqes. Në ditët e fundit të mandatit të saj, nuk u kandidua për presidente të vendit nga partia në pushtet, teksa ajo me dekret shpërndau Kuvendin e Kosovës. Ky dekret megjithatë nga Gjykata Kushtetuese u vendos që të mos ketë efekt juridik, pasi Kushtetuesja vlerësoi se Kuvendi ka kohë edhe 34 ditë deri në zgjedhjen e presidentit të ri të vendit. Osmani përfundoi detyrën e saj si presidente e vendit sot me 4 prill, duke ia liruar vendin kryeparlamentares, Albulena Haxhiu e cila do të ushtrojë detyrën e presidentes deri në zgjedhjen e presidentit të ri nga Kuvendi. Detajet në kronikën e përgatitur nga Klan Kosova: https://www.youtube.com/watch?v=4BrIRk2oRlo