Rudolph: Do të vazhdojmë të mbështesim FSK-në dhe Kosovën drejt integrimit euroatlantik

Ambasadori gjerman në Kosovë, Rainer Rufolph, ka takuar ministrin e Mbrojtjes, Ejup Maqedonci, ku ka theksuar mbështetjen e vazhdueshme të Gjermanisë në kuadër të iniciativës “Enable and Enhance” - me 3 milionë euro në vitin 2026 për pesë projekte kyçe. Siç njofton ambasada në rrjetet sociale, thuhet se këto projekte fokusohen në forcimin e shërbimeve mjekësore, logjistikës dhe kapaciteteve zjarrfikëse brenda Forcës së Sigurisë së Kosovës (FSK) - kontribute konkrete që rrisin gatishmërinë operacionale dhe zhvillimin institucional. “Shkëmbimi përfshiu gjithashtu asistencën e vazhdueshme të Gjermanisë në trajnimin ushtarak: kadetët kosovarë që aktualisht ndjekin trajnime gjuhësore në Gjermani do të vazhdojnë me edukimin për oficerë në përputhje me standardet e NATO-s - një investim në gjeneratën e ardhshme të udhëheqjes brenda FSK-së”. “Përveç kësaj, programi dypalësh për vitin 2026 parasheh një gamë të gjerë aktivitetesh të përbashkëta, përfshirë shkëmbime ekspertësh dhe trajnime në logjistikë, polici ushtarake dhe edukim të oficerëve”, u tha në njoftimin e Ambasadës gjermane. Gjermania, tha njoftimi, ka qenë një partner i besueshëm për FSK-në që nga fillimi – “dhe mbetet e përkushtuar për thellimin e këtij bashkëpunimi dhe për mbështetjen e Kosovës në rrugën e saj drejt integrimit euroatlantik”. Nga ana tjetër, ministri Maqedonci tha se Republika Federale e Gjermanisë përmes programit “Enable and Enhance” po vazhdon të mbështesë zhvillimin dhe rritjen e kapaciteteve të Forcës së Sigurisë së Kosovës. “Sot, Ministria e Mbrojtjes ka pranuar një donacion në vlerë prej 3 milionë eurosh nga Ministria e Mbrojtjes e Gjermanisë, i dedikuar për realizimin e pesë projekteve konkrete, me fokus në plotësimin e flotës së transportit ushtarak si dhe në zhvillimin e kapaciteteve të mbështetjes mjekësore”. “Me Ambasadorin e Gjermanisë në Kosovë, Rainer Rudolph, i cili sot zyrtarizoi këtë donacion, diskutuam gjithashtu për zgjerimin dhe thellimin e mëtejmë të bashkëpunimit në fushën e mbrojtjes”. “Vielen Dank, Deutschland”, shkroi Maqedonci. /Klanoksova.tv