Rumuni arrestohet për dyshim të klonimit të kartelave bankare (VIDEO)

Policia e ka arrestuar një shtetas të huaj, pasi i njëjti dyshohet se ka tërhequr para kundërligjshëm nga bankomatet në Kosovë. Klani merr vesh se burri ishte rumun, dhe i njëjti ra në dorën e organeve të rendit pasi u lajmërua nga disa qytetarë. Televizioni jo zyrtarisht ka kuptuar se i dyshuari ka keqpërdorur edhe kartelat e shtetasve të tjerë të huaj. “Dyshohet se i njëjti me kartela të klonuara ka tentuar ose ka tërhequr para nga bankomatët e bankave të ndryshme në Kosovë. Në cilësi të provave dëshmive materiale janë sekuestruar: Një telefon celular; Një SIM kartel; Para të gatshme 1200 euro; Rreth 387.02 Funta Anglez; 27 kartela të ndryshme bankare, të dyshuara të klonuara.” thuhet në njoftimin e policisë. Por si mund të klonohen të dhënat e një klienti të bankës, tregon ekonomisti Ergon Bega. “Klonimi është një proces që ndodhë nga kopjimi i të dhënave qoftë në bankë, apo në kompani të ndryshme ku bëhen pagesa përmes kartelave dhe në qoftëse databazat e këtyre kompanive nuk janë të sigurta atëherë mund të keqpërdoren” tha Bega. Sipas tij në procesin e klonimit zakonisht kryhen transaksione të vogla, që e bëjnë më të vështirë detektimin nga klientët se po i përdoret kartela. Ai sugjeron që në momentin kur vërehet se ka keqpërdorime të lajmërohet banka që të pasivizohet kartela, e më pastaj edhe të ketë denoncim në polici.