SBASHK: Jemi në pritje të pagave për mësimdhënësit

Sindikata e Bashkuar e Arsimit dhe Shkencës është në pritje për mësimdhënësit. Kështu deklaroi për Klankosova.tv Reshit Kushaj, nga SBASHK. Kushaj tha se në mbrëmje do të zhvillohet një takim me kryetarët komunal të SBASHK-ut dhe ndoshta aty mund të merret ndonjë vendim për veprim sindikal. "Po, jemi ende në pritje të ekzekutimit të pagave" - tha ai. "Ne çdo mbrëmje në ora 20:00, zhvillojmë takime online me kryetarët komunal të SBASHK-ut dhe ndoshta aty mund të merret ndonjë vendim për veprim sindikal" - theksoi Kushaj për Klankosova.tv Ai shtoi se presin nga Qeveria e Kosovës të reflektojë lidhur me situatën. "Ne akoma nuk kemi ndonjë ftesë nga Qeveria. Kryetarët komunal të sindikatës po zhvillojnë takime me kryetarët e komunave dhe ne presim që ata të veprojnë, sepse siç e dini ju punëdhënëse është komuna" - shtoi ai. Ndryshe gjatë ditës së djeshme kryetari i SBASHK-ut Rrahman Jasharaj, ka thënë se do ta presin qeverinë deri më 5 tetor që t'i ekzekutojë pagat, dhe nëse kjo nuk ndodh mund të ketë rikthim të grevës. Të hënën ka nisur procesi mësimor pas pesë javësh për shkak të grevës.   09:43 - Asociacioni i Komunave: Të procedohen pagat për mësimdhënësit Asociacioni i Komunave të Kosovës i ka bërë thirrje Qeverisë që të procedojë me pagat e mësimdhënësve. Në reagimin e AKK-së thuhet se komunat janë punëdhënëse dhe përgjegjëse ndërsa Ministria e Financave është vetëm ekzekutuese e pagesave. “Bordi rithekson se Komunat janë punëdhënëse e përgjegjëse për vijueshmërinë në punë dhe përgjegjëse për ndalesat eventuale sipas legjislacionit në fuqi. MFTP-ja është vetëm ekzekutuese e pagesave, jo edhe ndërmarrëse e veprimeve të njëanshme pa asnjë vendimmarrje të punëdhënësit, në këtë rast Komunave”. Ky asociacion thekson se kjo qasje e nivelit qendror është në kundërshtim me praktikat e deritanishme. “Kjo qasje e nivelit qendror është në kundërshtim me praktikat e deritanishme të bazuara në ligjet pozitive në Kosovë. Deri më tani, në asnjë rast nuk ka ndodhë të kemi ndalesa të pagave të punëtorëve të asnjë sektori me të cilin menaxhojnë komunat, pa veprimin ligjor paraprak të vetë punëdhënësit”.