Sëmundja e veshkave lidhet me humbjen e dhëmbëve tek gratë e moshuara

Gratë e moshuara me sëmundje kronike të veshkave mund të humbasin aq shumë dhëmbë sa nuk janë në gjendje t'i përtypin dhe të flasin në mënyrë efektive, paralajmëron një studim i ri. Gratë pas menopauzës me sëmundje të veshkave kanë rreth 40% më shumë gjasa të kenë më pak se 20 dhëmbë, numri minimal i nevojshëm për të përtypur dhe folur në mënyrë adekuate, raportuan studiuesit të mërkurën në revistën “Menopause”, transmeton Klan Kosova. Hulumtuesit vunë në dukje se kjo lloj humbjeje e dhëmbëve shoqërohet gjithashtu me një rrezik në rritje të sulmit në tru dhe sëmundjeve të tjera sistemike si diabeti, sëmundjet e tiroides dhe osteoporoza. "Gjetjet tona sugjerojnë se parandalimi dhe menaxhimi i çrregullimeve të metabolizmit të mineraleve dhe kockave në gratë pas menopauzës me sëmundje kronike të veshkave, janë thelbësore për të parandaluar humbjen e dhëmbëve", përfundoi ekipi hulumtues i udhëhequr nga Dr. Ki-Ho Chung, profesor i asociuar në Shkollën Kombëtare të Universitetit Chonnam në Korenë e Jugut. Veshkat luajnë një rol kritik në shëndet duke filtruar produktet e mbeturinave dhe toksinat nga gjaku, shpjeguan studiuesit. Funksioni i veshkave ka tendencë të ulet pas menopauzës dhe shoqërohet me uljen e niveleve të hormoneve femërore tek gratë që kanë kaluar në menopauzë. Për këtë studim, hulumtuesit analizuan të dhënat shëndetësore për gati 65,000 gra koreano-jugore të moshës 40 deri në 79 vjeç.