Serbia shpreh dëshirën të jetë “paqësuese” mes Rusisë e Ukrainës

Ministri i Jashtëm serb, Marko Gjuriq, tha se Beogradi është i gatshëm të organizojë bisedime paqeje midis Ukrainës dhe Rusisë. Në një intervistë për “Fox News Digital”, ai tha se vendi i tij është i gatshëm të angazhohet në dhënien fund të “kësaj tragjedie të tmerrshme” që ka lënë “shumë të vdekur”. “Serbia është gjithashtu midis vendeve që ofrojnë shërbimet e tyre të mira, duke pasur parasysh të kaluarën tonë, duke pasur parasysh faktin se jemi miq me të gjitha palët e përfshira, për të provuar dhe, nëse është e nevojshme ose nëse ka interes, të organizojmë çdo lloj bisedimesh... se si t'i japim fund kësaj tragjedie të tmerrshme, e cila ka rezultuar në kaq shumë vdekje dhe kaq shumë shkatërrime”, tha ministri i jashtëm serb, transmeton Klankosova.tv. Sipas “Fox News Digital”, disa analistë thonë se Serbia do të ishte një zgjedhje e habitshme për të qenë nikoqire e raundit të ardhshëm të bisedimeve për armëpushim midis Rusisë dhe Ukrainës, duke pasur parasysh lidhjet historike që Moska dhe Beogradi ndajnë, të rrënjosura në lidhjet kulturore dhe fetare përmes Kishës Ortodokse Serbe. Ndërsa Serbia iu bashkua rezolutave të OKB-së që dënonin pushtimin e Ukrainës nga Rusia dhe referendumet që aneksonin pjesë të territorit ukrainas, Beogradi ka refuzuar t'i bashkohet sanksioneve perëndimore që synojnë Rusinë për shkak të pushtimit. Megjithatë, Gjuriq në këtë intervistë thekson se si Ukraina ashtu edhe Rusia “mbështesin integritetin territorial të Serbisë” në lidhje me Kosovën. Disa zyrtarë evropianë kanë vënë në pikëpyetje përkushtimin e Serbisë ndaj unitetit evropian. Ndërkaq, Gjuriq tha se Serbia e vlerëson pozitën e saj në Evropë mes Lindjes dhe Perëndimit, duke theksuar njëkohësisht marrëdhëniet e ngushta që vendi ka me Shtetet e Bashkuara. Megjithatë, lidhjet e Serbisë me Kinën, e cila shihet gjerësisht si konkurrenti kryesor ekonomik dhe ushtarak i Shteteve të Bashkuara në skenën botërore, kanë shkaktuar disa shqetësime në Uashington. Kohët e fundit, ShBA-ja ka sanksionuar kompaninë serbe të naftës në pronësi ruse, “Naftna Industrija Srbije” (NIS), e cila është furnizuesi kryesor i naftës dhe benzinës së Serbisë. Kina kreu ushtrime ushtarake në Serbi në korrik, pavarësisht paralajmërimeve të ashpra nga Bashkimi Evropian, dhe Beogradi i siguron Pekinit një pikëmbështetje sigurie në Evropë. Serbia ka blerë gjithashtu sisteme raketash tokë-ajër me rreze të mesme dhe të shkurtër veprimi nga Kina. Depërtimi më i madh i Pekinit në Serbi është në hapësirën ekonomike, pasi ka investuar më shumë se 10 miliardë dollarë në projekte infrastrukturore gjatë 15 viteve të fundit, sipas Qendrës për Analizën e Politikave Evropiane. “Gjithashtu duhet të pranoj se kemi marrëdhënie shumë të mira ekonomike me Kinën, dhe Kina gjithashtu mbështet qëndrimin tonë për Kosovën në kuptimin që ajo njeh Serbinë dhe kufijtë e saj të OKB-së. Pra, ata, si anëtar i Këshillit të Sigurimit të OKB-së, janë gjithashtu një partner i rëndësishëm për ne”, tha Gjuriq. Ai tha se rivaliteti midis Shteteve të Bashkuara dhe Kinës është “përtej nivelit të një vendi të vogël ballkanik” dhe se qeveria serbe do të vazhdojë të përqendrohet në zhvillimin ekonomik të vendit. /Klankosova.tv