Futbolli është ndalur për shkak të përhapjes në masë të virusit vdekjeprurës Covid-19, ndërsa në Itali ka debate e ide të shumta në lidhje me mënyrën se si mund të mbyllet sezoni i mbetur përgjysmë.

Presidenti i Federatës Italiane të Futbollit, Gabriele Gravina ka deklaruar sot se prioriteti maksimal është që t’i shkohet deri në fund sezonit aktual, por ka pranuar se ka disa rrethana që e vështirësojnë shumë këtë punë.

‘Për momentin plani ynë t’i shkojmë deri në fund këtij sezoni, pasi kjo është edhe detyra jonë, megjithatë shumë rrethana nuk i kemi në favor, Shumë do të varet nga ecuria e situatës së krijuar, pasi nuk mund t’i japim këtij sezoni hapësira përtej 15 korrikut. Kjo pasi sezoni i ri duhet të nisë patjetër brenda 15 gushtit, sepse kemi Europianin verën tjetër dhe duhet t’i lëmë hapësirë edhe kombëtares”, deklaro Gravina.

Një debat i madh është hapur kohët e fundit edhe në lidhje me pagat e futbollistëve, teksa të shumtë janë kubet që po kërkojnë ndërprerjen e tyre për periudhën që nuk ka aktivitet. Gravina tha se bashkë me drejtuesit e Ligës dhe kreun e shoqatës së futbollistëve po mendojnë një zgjidhje të pranueshme për të gjithë.

“E dimë vështirësinë e klubeve dhe dëmet që po pësojnë nga kjo situatë, ndaj po bashkëpunojmë me Ligën dhe Shoqatën e Fubollistëve, për të nxjerrë një rregullore të përgjithshme. Besoj se të gjithë duhet të sakrifikojmë nga pak në këtë periudhë”, u shpreh kreu i FIGC.