Sharapova humb Olimpiadën e Rio-s

Maria Sharapova nuk do të marrë pjesë në Lojërat Olimpike “Rio 2016”. Shkak është bërë shtyrja e seancës dëgjimore në Gjykatën e Arbitrzhit Sportiv për tenisten ruse dhe nisur nga ky fakt kampiones do t’i duhet të qëndrojë larg olimpiadës së Brazilit. Ish numri 1 i botës rezultoi pozitive me doping dhe u dënua me 2 vjet pezullim, por ajo nuk ka qenë aspak dakort me këtë vendim, duke e apeluar në Lozanë. Palët ranë dakord që seanca të shtyhet në mënyrë që të kënë më shumë kohë për të analizuar cështjen si dhe të mbledhin prova. Si afat kohor është lënë data 18 Korrik deri më 19 Shator, në mënyrë që Maria Sharapova të këtë mundësi të fitojë betejën e saj ndaj vendimit të dhënë. KAS gjithashtu ka sqaruar se ishin palët në proces që kërkuan më shumë kohë në dispozicion në mënyrë që të kishin mundësi të analizonin cështjen me detaje, raporton Supersport.al, transmeton Klan Kosova. Në këtë mënyrë, tenistja ruse nuk do të ketë mundësi të përfaqësojë Rusinë në Olimpiadë, duke iu shtuar radhës së gjatë të atletëve rusë që do të mungojnë në Rio për shkak të skandalit të dopingut që ka përfshirë sportin e këtij vendi. Mungesa e Sharapovas do të jetë një humbje e madhe për Olimpiadën pasi në vitin 2012 ajo u shpall nënkampione olimpike.