ShBA miraton shitje armësh prej 11 miliardë dollarësh për Tajvanin

Shtetet e Bashkuara kanë miratuar një paketë shitjeje armësh në vlerë 11.1 miliardë dollarësh për Tajvanin, një nga marrëveshjet më të mëdha ushtarake me ishullin vetëqeverisës, hap që pritet të acarojë më tej marrëdhëniet me Kinën. Paketa përfshin sisteme raketore HIMARS, raketa ATACMS, artileri vetëlëvizëse, dronë dhe raketa antitank, të cilat sipas Pentagonit synojnë forcimin e kapaciteteve mbrojtëse dhe parandalimit të Tajvanit. Autoritetet në Taipei e mirëpritën vendimin, duke theksuar se do të vazhdojnë modernizimin e ushtrisë dhe forcimin e mbrojtjes kombëtare. Kina reagoi ashpër, duke i bërë thirrje Uashingtonit të ndalë “armatimin e Tajvanit” dhe duke e cilësuar veprimin si ndërhyrje në punët e saj të brendshme. Pekini pretendon Tajvanin si pjesë të territorit të tij dhe ka paralajmëruar përdorimin e forcës për bashkim, ndërsa SHBA vijon ta mbështesë ishullin me armatim dhe asistencë ushtarake./Klankosova.tv