Shearer dhe Caine kërkojnë ndalimin e goditjes së fëmijëve në Angli

Ish-sulmuesi i kombëtares angleze Alan Shearer dhe aktori i njohur Sir Michael Caine i kanë bërë thirrje kryeministrit britanik Keir Starmer që të ndalojë me ligj goditjen e fëmijëve nga prindërit në Angli. Ata janë ndër emrat e njohur që kanë nënshkruar një letër të hapur, e cila do t’i dorëzohet sot qeverisë britanike. Në letër kërkohet që kjo praktikë e dhunshme dhe e dëmshme, e njohur si "smacking", të ndalohet me ligj në të gjithë Mbretërinë e Bashkuar. Goditja e fëmijëve është e paligjshme në Uells që nga viti 2022, dhe në Skoci që nga 2020. Por në Angli dhe Irlandën e Veriut, ligji ende lejon prindërit të godasin fëmijët nëse konsiderohet “ndëshkim i arsyeshëm”. Letra e dorëzuar qeverisë është përgatitur nga organizata NSPCC, dhe mbështetet nga Barnardo’s dhe Kolegji Mbretëror i Pediatrisë. Aktori Michael Caine, i njohur për rolet e tij në “Batman” dhe “The Italian Job”, tha se është krenar që i bashkohet kësaj thirrjeje: “Shumë vende e kanë ndaluar goditjen e fëmijëve. Edhe Anglia duhet të veprojë tani dhe të japë fund kësaj praktike të dëmshme.” Nga ana tjetër, Departamenti për Arsim tha se nuk ka plane për të ndryshuar ligjin në këtë fazë. Megjithatë, qeveria është duke shqyrtuar reforma të mëdha në sistemin e kujdesit për fëmijët, përmes një projektligji të ri që po kalon në Parlament. Aktivistët kërkojnë që ndalimi i goditjes të përfshihet si ndryshim ligjor në Projektligjin për Mirëqenien e Fëmijëve dhe Shkollat, i cili është ende në shqyrtim parlamentar.