Shefi i NATO-s tallet me nëndetësen ruse

Sekretari i Përgjithshëm i NATO-s, Mark Rutte, e talli sot Rusinë për gjendjen e keqe të njërës prej nëndetëseve të saj, ndërsa ajo po kthehej në tokë duke çaluar. Në një fjalim në Slloveni, Rutte tha se anija ishte “prishur”, duke shtuar se praktikisht në Mesdhe nuk ka prani detare ruse. "Tani praktikisht nuk ka prani detare ruse në Mesdhe. Ekziston një nëndetëse ruse e vetmuar dhe e prishur që po kthehet në shtëpi duke çaluar nga patrullimi", tha Rutte, transmeton Klankosova.tv "Çfarë ndryshimi nga romani i vitit 1984 i Tom Clancy-t 'Kërkimi për Tetorin e Kuq'. Sot duket më shumë si një kërkim për mekanikun më të afërt", shtoi ai. Flota ruse e Detit të Zi tha se nëndetësja me naftë Novorossiysk kishte dalë në sipërfaqe pranë brigjeve të Francës për të përmbushur rregullat e lundrimit në Kanalin Anglez, duke hedhur poshtë raportet për një mosfunksionim serioz. Por autoritetet holandeze thanë gjatë fundjavës se nëndetësja po tërhiqej në Detin e Veriut, shkruan Index.hr. Nëndetësja është monitoruar nga britanikët që nga janari. Nëndetësja Novorossiysk u lëshua në det në gusht 2014 dhe është pjesë e Flotës së Detit të Zi, por nuk besohet të ketë marrë pjesë në pushtimin e Ukrainës. Është një nëndetëse sulmi me motor nafte-elektrike që mund të qëndrojë nën det deri në 45 ditë dhe ka një ekuipazh prej 52 anëtarësh. Është e aftë të lëshojë raketa bërthamore Kalibr. Nëndetësja simotër e saj, Rostov-on-Don, u fundos në një sulm ukrainas gushtin e kaluar. Marina Mbretërore e ka monitoruar Novorossiysk që nga janari, kur u vu re në Kanalin Anglez. /Klankosova.tv