Shëndetësi - Pushteti nuk përkrah projektligjet e opozitës (VIDEO)

Anëtarët e Komisionit për Shëndetësi nga radhët e pushtetit nuk kanë mbështetur as Projektligjin për rregullimin e çmimit të produkteve medicinale, të propozuar nga Partia Demokratike e Kosovës e as atë për Shëndetësi, i cili u propozua nga Lidhja Demokratike e Kosovës. Këto dy ligje nuk morën miratim të këtij komisioni, pasi deputetët e Lëvizjes Vetëvendosje u shprehen se të dyja këto projektligje pritet shpejt të vijnë në kuvend nga qeveria. ''Tashmë në strategjinë legjislative të qeverisë janë të parapara këto dy projektligje dhe janë të parapara të procedohen në kuvend. Pra edhe Ligji për Shëndetësi edhe ai për rregullimin e çmimit të produkteve medicinale'', ka thënë Fatmire Kollqaku, kryetare e Komisionit për Shëndetësi. https://www.youtube.com/watch?v=6Ok6eeIm1cM Ani se u vlerësua si i qëlluar projektligji i PDK-së, prapë nuk u përkrah nga pushteti. ''Ka qenë e qëllimshme zhagitja e projektligjit, deri sa të fillojë ministria të punojë'', ka thënë Bekim Haxhiu nga PDK-ja. Edhe propozimi i Armend Zemajt të LDK-së, për projektligjin për shëndetësi, mbeti vetëm diskutim. ''Ka kohë që nuk kemi ligj të ri të shëndetësisë. Po hyjmë më duket në vitin e 10-të që nuk ka ndryshime ligjore dhe ky sektor duhet të avancojë sidomos në rritjen e cilësisë së shërbimeve'', u shpreh ai.