Sheshi Shatërvan në Prizren do të jetë i bllokuar për qarkullim të mjeteve motorike

Komuna e Prizrenit bën të ditur se Sheshi Shatërvan do të jetë i mbyllur nga nesër për kalim të të gjitha mjeteve motorike. Nga kjo komunë thonë se kjo po bëhet për shkak të fluksit të vizitorëve gjatë ditëve kur organizohet festivali i filmit Dokufest dhe me qëllim të rritjes së nivelit të sigurisë. Kjo u bë e ditur në faqen zyrtare në Facebook të kësaj komune, transmeton Klan Kosova. Ja postimi i plotë: Duke pasur parasysh fluksin e madh të vizitorëve gjatë ditëve kur organizohet festivali i filmit Dokufest dhe me qëllim të rritjes së nivelit të sigurisë dhe krijimit të kushteve të përshtatshme për organizim të festivalit, Komuna e Prizrenit në bashkëpunim me Policinë e Kosovës do të marrin këto masa të sigurisë: - Sheshi Shatërvan do të jetë i bllokuar për qarkullim për të gjitha mjetet motorike. Ndalesa do të vlejë prej orës 10:30, kur përfundon orari i furnizimit të lokaleve në këtë zonë. Qarkullimi do të jetë i bllokuar në Urën e Arastës, ndërsa përjashtim do të kenë banorët me dëshmi të adresës së banimit brenda kësaj zone, si dhe mjetet që shërbejnë për nevoja të Dokufestit. - Të gjitha lokalet dhe kafiteritë ndalohet të kenë zë të lartë prej orës 20:00, sidomos ato pranë qendrës Evropa, në Sheshin Shatërvan dhe Sheshin e Lidhjes. Për këtë gjë do të jenë të njoftuar të gjithë lokalet nga ana e inspektoratit komunal. Këto masa do të jenë në fuqi nga nesër më 02.08.2019, deri më​ 12.08.2019.