Shkëlzen Gashi dyshohet për nxitje të përçarjes dhe mosdurimit

Drejtoria për Hetimin e Krimeve të Rënda e Policisë ka bastisur sot banesën e Shkëlzen Gashit. Ai dyshohet për nxitje të përçarjes dhe mosdurimit sipas dokumentit të Prokurorisë Speciale të Kosovës të publikuar nga Rron Gjinovci. PSRK-ja i fton urgjentisht organet e rendit që të mbledh prova materiale lidhur me ekspozitën për Masakrën e Dubravës dhe masakrave të tjera që kishin ndodhur në Kosovë. Kjo ekspozitë ngjalli reagime të mëdha për shkak të pasaktësive të të dhënave. Dokumenti i plotë: URGJENT POLICISË SË KOSOVËS Drejtoria Kundër Krimit të Organizuar dhe Krimeve të Rënda – Në bazë të nenit 83 par. 1 të Kodit të Procedurës Penale të Republikës së Kosovës (KPPK), parashtroj këtë: AUTORIZIM PËR GRUMBULLIM TË INFORMATIVE DHE PROVAVE TË NEVOJSHME Sipas provave materiale dhe raportimeve të publikuara në media nga ana e të dëmtuarve në masakrën e Dubravës, dhe masakrat tjera të ndodhura në Kosovë, e po ashtu edhe nga raportimet e qytetarëve, të cilët kanë qenë të dëmtuar dhe viktima të këtyre masakrave, Prokuroria Speciale ka hapur rast penal ndaj të dyshuarit Shkëlzen Gashi, i cili me veprimet e tij publike dyshohet se ka shkaktuar përçarje dhe mos durim me qytetarëve tanë duke dëmtuar dhe ndryshuar të vërtetën e luftës çlirimtare në Kosovë, e që konsiderohet se me këto veprime i dyshuari ka përmbushur elementet e veprës penale “Nxitja e përçarjes dhe mos durimit” nga neni 141 të KPK-së. Andaj, Prokurori i shtetit me qëllim të sqarimit të plotë të gjendjes faktike dhe sigurimit të provave tjera në këtë rast penal, AUTORIZON Zyrtarët policor, nga Drejtoria Kundër Krimit të Organizuar dhe Krimeve të Rënda, që të ndërmarrin MENJËHERË të gjitha veprimet e nevojshme hetimore për mbledhjen informative dhe provave relevante duke e sqaruar se cila ka qenë arsyeja e veprimeve të dyshuarit, si dhe të sigurojnë edhe prova tjera në bazë të cilave pastaj do të vendoset për veprimet e mëtutjeshme. Në veçanti, të sigurohet menjëherë prezenca e të dyshuarit Shkëlzen Gashi, i cili do të intervistohet në cilësinë e të dyshuarit duke sqaruar veprimet e tij, dhe nga i ka siguruar burimet e informatave të cilat edhe i ka publikuar e të cilat duket të jenë të pavërteta. Pas mbledhjes së informatave dhe provave relevante, dhe pas analizimit të tyre, autorizoheni që në konsultimin me Prokurorin e rastit, të merren në pyetje dëshmitar potencial, i dëmtuari si dhe të dyshuarin/t tjerë, e po ashtu të ndërmerren edhe veprime tjera me qëllim të hetimit të suksesshëm të kësaj çështje penale-juridike. Pas ndërmarrjes së veprimeve hetimore, duke u bazuar në nenin 83 par. 3 të KPRK-së, obligoheni që prokurorit të çështjes t’i paraqitni raport me shkrim lidhur me veprimet e ndërmarra, brenda një afati sa më të shkurtër kohor.