Shkolla e futbollit "Pro Prishtina" rrëmben pesë çmime në “Shkodra Event 2022” (VIDEO)

Në turneun e organizuar nga Shoqata Rajonale e Futbollit Shkodran, pjesëmarrës ishin mbi 50 shkolla të futbollit. Në mesin e tyre ishte edhe Shkolla e Futbollit "Pro Prishtina", me 320 nxënës. Ata, me gjeneratën U-9, e fituan çmimin si ekipi me lojën më të mirë. Ndërsa, nga e njëjta gjeneratë futbollisti Erdi Sopjani fitoi çmimin e lojtarit më të mirë nga 1 mijë lojtarë që ishin pjesëmarrës në “Shkodra Event 2022”. Sukses arriti edhe gjenerata U-13 e "Pro Prishtinës", që e fitoi titullin kampion. Për këtë arritje më meritorët ishin Edvin Maksuti dhe Leon Hyseni, që fituan edhe çmime individuale. I pari u zgjodh si mesfushori më i mirë, ndërsa i dyti sulmuesi më i dalluar në turne. Jo vetëm grupmoshat U-9 dhe U-13 fituan çmime. Futbollistët e "Pro Prishtinës" deri në moshën 11-vjeçare e rrëmbyen çmimin si ekipi më i mirë. Kjo ishte hera e pestë që organizohet “Shkodra Event”, kurse ishte hera e parë që shkolla e futbollit Pro-Prishtina mori pjesë. https://www.youtube.com/watch?v=e1Prrn4c-mQ