Shkurte Fejza për koncertin në Klan Kosova: 17 këngë për figurat më emblematike të Pavarësisë

Kosova dhe Klan Kosova sot shënojnë përvjetorët e tyre. Kosova 14-vjetorin e shtetësisë e Klan Kosova 13-vjetorin e themelimit, për të dy festat televizioni do ju sjell shikuesve një koncert të këngëtares, Shkurte Fejza të realizuar në Klan Arena. Këngëtarja e muzikës popullore, Shkurte Fejza, tha se realizimin e një koncerti të tillë për Ditën e Pavarësisë e kishte ëndërruar teksa dha detaje nga koncerti, njofton Klankosova.tv. “Është një ndjenjë madhështore kur di se të gjithë i dinë e këndojnë këngët e mija. Këngët e mija kanë emocionin brenda, pasi janë histori dhe unë e kam peng që nuk mund të këndoj “Mora këngë”. Por, falë Zotit këngët e mija i dinë të gjithë, por, do të doja ta këndoja bashkë me ta”. “Dedikimi që më ka dhënë këtë energji pasi është ditëlindja e Kosovës dhe të gjithë i dimë sakrificat që i kemi kaluar dhe shumë mirë që shteti feston ditëlindjen – për mua është e jashtëzakonshme”. “Gjithë të mirat për Kosovën, rroftë e qoftë sa të jetë jeta”, tha Fejza. "17 këngë i përgjigjen ditëlindjes së Kosovë, me njerëz e figura të ndryshme që kanë kontribuar dhe kanë dhënë më të mirën për këtë vend. Mora fjala, kënga për Adem Ramadani, Skenderbeun, Ibrahim Rugovën, e shumë figura të tjera do t’i këndoj sonte”. Kompozitori, Florent Boshnjaku, në “Ora Shtatë” në Klan Kosova, tha se këngët janë riorkestuar nga një orkestër prej 35 personash. “Koncertin e kemi sjell në një format tjetër, këngët mbesin ato dhe nuk kanë ndryshuar, por, nga një orkestër prej 35 personash janë riorkestuar nga unë”. Boshnjaku, nuk la pa përmendur edhe ekipin e Klan Kosova për punën kolosale. “Ekipi në Klan Kosova ka qenë i jashtëzakonshëm që kanë dhënë gjithçka për të organizuar një produksion të tillë e që nuk është aspak e lehtë. Sonte do të jetë një natë e historisë që e rikujtojmë gjithmonë por do të festojmë”, tha Boshnjaku.