ShSKUK: Fillon caktimi i termineve përmes telefonit për vizita specialistike në Klinikën e ORL-së dhe të Syve

Shërbimi Spitalor Klinik dhe Universitar i Kosovës bën të ditur se të gjithë pacientët nga dita e mërkurë, 6 korrik 2022,  mund të fillojnë me caktimin e termineve përmes telefonit për vizita specialistike në Klinikën e Otorinolaringologjisë (ORL)  dhe Klinikën e Syve të Qendrës Klinike Universitare të Kosovës. Në njoftimin e lëshuar thuhet se caktimi i termineve bëhet çdo ditë pune, nga e hëna të premte,  në telefonin 038 500 600 34 44, nga ora  12:00 deri 14:30. "Pacienti me rastin e telefonimit duhet të ketë si dëshmi fletë-udhëzimin nga mjeku familjar, apo nga  mjeku specialist përkatës.  Po ashtu, duhet të prezantohet edhe numri i letërnjoftimit dhe numri i telefonit". "Vëni re! Nëse bëni termin pa udhëzim  nga mjeku përkatës, termini juaj do të anulohet! ShSKUK është në finalizim  të planit për caktim të terminëve përmes telefonit  në të gjitha ambulancat specialistike të QKUK-së, për të cilat do të ju informojmë  në vijim", thuhet në njoftim, transmeton KlanKosova.tv.