Shtëpia e Kulturës në Runik, Ministria e Kulturës me apel për Komunën e Skenderajt (FOTO)

Ministria e Kulturës vlerëson se Shtëpia e Kulturës në Runik është aset i trashëgimisë kulturore në mbrojtje, si dëshmi e historisë kulturore dhe rëndësisë së saj për banorët e Runikut dhe fshatrat rreth tij. Sipas këtij dikasteri qeveritar ndërhyrjet degraduese nga ana e Komunës së Skenderajt janë bërë pa pëlqimin e tyre dhe në kundërshtim me Ligjin për Trashëgiminë Kulturore. “Institucionet përgjegjëse të Ministrisë menjëherë kanë dalë në vend të ngjarjes për të bërë vlerësimin fillestar të gjendjes, ndërsa Inspektorati i Trashëgimisë Kulturore ka ndërmarrë hapat ligjorë për ndalim të punimeve të paligjshme nga ana e autoriteteve komunale”, thuhet në reagim, transmeton KlanKosova.tv “Ky monument ngërthen kujtimet e komunitetit për ngjarjet e pasura kulturore të organizuara në bibliotekën, kinemanë dhe sallën koncertale, si pjesë e rëndësishme e kujtesës kolektive”. Ministria e Kulturës i ka bërë apel Komunës së Skenderajt që t’i ndërpesë veprimet e saj, që cilësohen të paligjshme “Dhe njëkohësisht rikujtojmë që mbrojtja e vlerave të përbashkëta të trashëgimisë kulturore është përgjegjësi e të gjitha institucioneve shtetërore, qendrore e lokale”. Rrini të informuar mbi zhvillimet kryesore duke u bërë pjesë e komunitetit tonë në Viber BONUS: Merreni aplikacionin tonë në Android dhe iOS