Shtëpisë së Sadik Jasharit në Prekaz i vendoset mburojë (VIDEO)

Gjendet përballë varrezave të të gjithë të rënëve, pak metra larg shtëpisë së familjes të Adem Jasharit. Por ajo e Sadikut në kompleksin memorial në Prekaz, nuk është e mbrojtur si ajo e komandantit legjendar të Ushtrisë Çlirimtare të Kosovës. Tek në dhjetor, pas gati 25 vjetësh prej kur u dogj e nga ku 15 veta ranë dëshmorë, po punohet një mburojë që e siguron shtëpinë nga dëmtimi. Për investimin që e pritën gjatë shprehen të lumtur fëmijët e Sadikut. “Kjo shtëpi ka mbetur në mëshirën e fatit për një kohë të gjatë. Sigurisht që kemi edhe shkatërrime, në këtë drejtim urojmë që ato të mos jenë të masës së madhe”, tha Xhemajl Jashari, djali i Sadik Jasharit. E me gjithë kohën që ka kaluar, pasardhësi i dëshmorit, nuk e harron bisedën e fundit me familjarët që ranë në tre ditët tragjike - 5,6 e 7 mars të vitit 1998. “Pak para luftimeve këtu e thirra në telefon vëllaun qysh është gjendja, forcat janë nis drejt Likoshanit e Qirezit, qysh është gjendja në Prekaz, tha vëllau na jemi të rrethuar, por jemi të përgatitur, do të qëndrojmë e do ta mbrojmë vendin”, u shpreh tutje ai. Punët doli t’i shohë edhe i pari i dikasterit të Kulturës Hajrulla Çeku, i cili tha se ndërhyrje po bëhen edhe në objekte të tjera të kompleksit. “Disa ndërhyrje emergjente veçse kanë përfunduar, disa janë në proces, do të thotë po flasim për 4-5 objekte, ndërtesa në kompleksin memorial, kjo që sapo e vizituam besoj se gjatë janarit do të përmbyllet, do të jetë një lloj mbulese për ta siguruar që reshjet nuk e dëmtojnë”, deklaroi Çeku. Ministria ka në plan që gjatë vitit tjetër të shpallë konkursin ndërkombëtar për një masterplan, i cili do të shpërfaqë se çfarë restaurimi dhe konservimi do t’i bëhet gjithë zonës së kompleksit. https://www.youtube.com/watch?v=3VzOCQQqsaA