Shteti mbron 73 objekte, 4 nga to iu dogjën brenda vitit (VIDEO)

Një nga një, katër objekte të trashëgimisë kulturore u dogjën pak kohë pasi nisën punimet për restaurimin e tyre. Fajtori vazhdon të mbetet jetim. Të gjithë kthejnë sytë kah pronarët pasi lufta mes tyre dhe shtetit është e kamotshme. Ndonëse këto objekte u dogjën përderisa ishin në mbrojtjen e tyre, nga Ministria e Kulturës për Kiksin kanë thënë se prioritet është mbrojtja e objekteve. Derisa zotohen se po bëjnë çmos që objektet nën mbrojtjen e shtetit të ruhen të tillë siç janë, të mbrohen, të restaurohen e të investohet në to, askush nga zyrtarët e lartë të kësaj ministrie nuk kanë folur për Kiksin. Ajo të cilën e deleguan që të japë sqarime është këshilltare politike për Trashëgimi Kulturore e ministrit Hajrullah Çeku. Nora Arapi-Krasniqi tha së djegia e po këtyre institucioneve kulturore është shqetësuese. Ajo thotë se janë duke punuar që të dihen autorët e këtyre veprave. E lidhur me kërkesat e pronarëve të objekteve të trashëgimisë për kompensimin nga shteti, ajo thotë se një gjë e tillë nuk është se nuk iu bëhet. Nga ky dikaster kanë treguar se lista e Trashëgimisë Kulturore në Mbrojtje të Përhershme në vitin 2021 ka pasur vetëm 23 asete, derisa aktualisht numëron plot 73. E njëjta, sipas tyre, pritet të shtohet e të pasurohet. E rreth shumicës së këtyre monumenteve, të shumta janë ndërtesat përreth, të cilat ua zënë frymën këtyre objekteve. Por, nga MKRS-ja thonë se tashmë e kanë bërë një zgjidhje. Për më shumë, ndiqeni kronikën në vijim: https://youtu.be/zpFGNpuJSrU