Shteti në aksion, kapet zyrtari i dyshuar për dallavere me tenderë në vlerë të 8.8 mln euro

Policia e Kosovës, konkretisht Njësia Rajonale për Hetimin e Krimeve Ekonomike dhe Korrupsionit në Prishtinë, pas hetimeve në koordinim me Prokurorinë Speciale ka arrestuar një zyrtar të dyshuar për “keqpërdorim të pozitës zyrtare” në procedurat e tenderëve publikë. Sipas njoftimit, gjatë hetimeve janë siguruar prova që mundësojnë dyshimin se zyrtari publik ka ndihmuar operatorët ekonomikë për t’u shpallur fitues në tenderë të caktuar, duke përshtatur kriteret e përcaktuara nga autoritetet kontraktuese në mënyrë të kundërligjshme. Vlera totale e tenderëve në fjalë tejkalon 8.8 milionë euro, transmeton Klankosova.tv Veprimet hetimore janë zhvilluar në bashkëpunim të vazhdueshëm me Prokurorinë Speciale të Republikës së Kosovës, duke përfshirë sigurimin e dëshmive dhe masa të tjera hetimore, përfshirë sekuestrimin e pajisjeve komunikuese. "Personi i dyshuar është intervistuar dhe, me urdhër të Prokurorisë Speciale, është dërguar në mbajtje për 48 orë, ndërsa dy të dyshuar të tjerë janë liruar në procedurë të rregullt. Rasti vazhdon të hetohet dhe Policia e Kosovës dhe në bashkëpunim me organet e drejtësisë do të ndërmerren veprime tjera." - njoftoi Policia/Klankosova.tv