Shuarja e Margarita Xhepa, Begaj: Artin e përdori për kauzat në mbrojtje të grave dhe fëmijëve

Sot ka vdekur ylli i kinematografisë shqiptare, Margarita Xhepa. Lidhur me këtë lajm, është shprehur i trishtuar presidenti i Shqipërisë, Barjam Begaj, transmeton Klankosova.tv. Begaj thotë se e ndjera, me interpretimet e saj, ku spikati në mishërimin e figurës së gruas dhe veçanërisht të nënës, çoi dritë dhe u bë pjesë e dashur e familjeve shqiptare. "Artistja e madhe, një figurë publike e respektuar, grua dhe nënë e nderuar, deri në vitet e fundit të jetës së saj iu kushtua artit dhe artin e saj e përdori për kauza të rëndësishme në mbrojtje të grave dhe fëmijëve", shkroi tutje Begaj. "Ngushëllimet e mia më të ndjera shkojnë për familjen, që sot iu nda nga jeta njeriu i tyre i shtrenjtë, për komunitetin e artistëve shqiptarë dhe për mbarë shqiptarët që e kanë ndjekur dhe duartrokitur artin që Margarita Xhepa dhuroi ndër vite".