Si t'i vishni fëmijët në mot të ftohtë sipas rekomandimeve të pediatrit? (VIDEO)

Përgjatë stinës së dimrit, të vegjlit kanë dëshirë të dalin në ajër të pastër që të luajnë me borë, për këtë arsye prindërit përkujdesën që t'i veshin ata në atë mënyrë që t'i përballojnë temperaturat e ulëta, por pa qenë të vetëdijshëm se rrobat e tepërta mund të jenë të rrezikshme për ta. Ani pse tradicionalisht të vegjlit janë veshur më trashë se të rriturit, ky qëndrim ka filluar të ndryshojë me kalimin e kohës. Tani profesionistët relevantë i këshillojnë prindërit që fëmijët e tyre t'i veshin njëjtë si të rriturit dhe varësisht temperaturave, ngase një veshje e stërngarkuar shpeshherë të vegjëlve u jep pamjen e një roboti, i cili e ka të vështirë lëvizjen. Kjo ka bërë që ekspertët e kësaj fushe t’i paralajmërojnë prindërit, se kjo gjë mund të sjellë pasoja. Te fëmijët, sidomos tek ata të cilët janë në muajt e parë të jetës, një veshje joadekuate mund të shkaktojë djersitje të tepërt dhe kjo na shpie drejt dehidrimit, apo në raste ekstreme deri te sindroma e vdekjes së papritur e foshnjës, e njohur si SIDS. Ndaj, një veshje e lirë apo komforte që fëmijët të mund të lëvizin dhe luajnë lirshëm dhe me materiale pambuku, sipas dr. Lendrit Spahiut, është ajo e duhura.