Sokoli: "Në pandemi u pa se sa i rëndësishëm është arti për shoqërinë" (VIDEO)

Artisti vizual Hekuran Sokoli ka thënë se në kohën e pandemisë është dëshmuar se sa është i rëndësishëm arti për shoqërinë. I ftuar në radio Klan Kosova FM në emisionin "Çeli sytë me Arin" për të biseduar rreth veprës së tij artistike “Ekuilibri i Papërsosur” e cila u përzgjodh nga Ministria e Kulturës, Rinisë dhe Sportit për pasurimin e fondit publik të artit, Sokoli tregoi se mbylljen totale si pasojë e pandemisë e përjetoi rëndë, por se ajo edhe e ka shtyrë që ta gjej veten si artist. “Përveç disa vështirësive personale që i kam pasur, pandemia mua më ka shtyrë që të punoj. Normal që kemi vuajtur shumë sepse ka qenë një mbyllje, një periudhë shumë e vështirë – vetëm pamja e rrugëve të zbrazëta dhe pamundësia për ta përqafuar dikë ka qenë e vështirë”, tha ai, duke vlerësuar se "një gjë që është vërtetuar gjatë kohës së pandemisë është fakti se arti e bën jetën më të mirë". "Gjatë mbylljes në shtëpi kur e ke lexuar një libër – atë libër e ka shkruar një artist, atë film që e ke parë – e ka luajtur një artist, atë muzikë që e ke dëgjuar – e ka kënduar një artist", tha krijuesi i artit gjeometrik. Më pas ai ka vazhdar të flasë për procesin e punës së tij nga skicimi e deri te realizimi final i veprës. “Gjithçka nis me skicë dhe pastaj aty bëhen lojëra të ndryshme se çfarë përshtatet e çfarë jo. Pastaj e vizatoj atë skicë në pëlhurë – ashtu edhe siç po shihet vijat duhet të jenë precize – duhet një koncentrim i madh dhe një lojë sepse jo çdo herë mund ta parashohësh finalizimin e punimit. Ju në fakt e nisni punimin, por asnjëherë nuk e dini se si do të dalë sepse ndoshta bash ajo që e ke menduar nuk del ashtu siç e ke menduar", tha Sokoli. Më poshtë mund ta dëgjoni intervistën e plotë. Ndërsa për të mësuar më shumë rreth veprës “Ekuilibri i Papërsosur”, klikoni në linkun e mëposhtëm. https://klankosova.tv/vepra-artistike-e-gazetarit-te-klan-kosoves-pasuron-fondin-publik-te-artit-ne-kosove/?fbclid=IwAR3soTkcUmEX6k_Sy067WlYlNRYkShitNrJI7BNWcVNKO9AFEbwX0NiXBcU

klankosova.tv