Sot bëhet një vit nga konfirmimi i dy rasteve të para me COVID në Kosovë

Sot është bërë një vit prej se kur janë konfirmuar dy rastet e para me COVID-19 në Kosovë. Ishin kryeministri i atëhershëm, Albin Kurti, dhe ish-ministri i Shëndetësisë, Arben Vitia, ata të cilët i konfirmuan këto dy raste përmes një konference për media, njofton Klan Kosova. Një 77-vjeçar nga fshati Stubëll i Vitisë dhe një shtetase italiane ishin dy rastet pozitive nga 15 mostra që ishin testuar mes 12 e 13 marsit të vitit të kaluar. Tani kur janë bërë një vit nga konfirmimi i rasteve të para, numri total i rasteve pozitive është 76.110 raste nga 348.381 persona të dyshimtë në virusin SARS-CoV-2 dhe 1.688 raste të vdekjes. Vetëm gjatë ditës së djeshme janë konfirmuar 730 raste të reja me COVID-19. Kujtojmë se Kosova është vendi i vetëm në Ballkanin Perëndimor që ende nuk ka nisur me procesin e vaksinimit kundër koronavirusit.

klankosova.tv