SPAK përfundon hetimet për skemën e mikrokredive, 16 persona dërgohen në gjykatë

Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për një nga skemat më të mëdha të mashtrimit financiar në Shqipëri, duke çuar për gjykim 16 persona fizikë dhe 4 persona juridikë. Të akuzuarit dyshohen se kanë qenë pjesë e një grupi të strukturuar kriminal, i cili për më shumë se nëntë vite akuzohet se ka mashtruar mijëra qytetarë në nevojë ekonomike, përmes një sistemi agresiv dhe të paligjshëm të mikrokredisë dhe përmbarimit. Në qendër të skemës qëndronte Arben Meskuti, i cilësuar si organizator dhe drejtues i grupit kriminal, bashkë me bashkëpunëtorët e tij, përfshirë ish-drejtues dhe punonjës të kompanive Micro Credit Albania, Final, ADCA dhe zyrës së përmbarimit TDR Group. Ata akuzohen për “Mashtrim me pasoja të rënda”, “Falsifikim dokumentesh”, “Grup të strukturuar kriminal” dhe vepra të tjera të ngjashme penale. Sipas SPAK, grupi kriminal kishte ngritur një rrjet kompleks veprimi: Përdorim i të njëjtit sistem kompjuterik për manipulimin e të dhënave financiare; Kalim të detyrimeve nga një familjar tek tjetri në mënyrë të paligjshme; Zgjerim i detyrimeve përmes interesave përditore deri në 2%; Sekuestrim i padrejtë i pasurive për shuma minimale; Mbajtje peng e mijëra llogarive bankare të qytetarëve për vite me radhë; Ankande fiktive për kalimin e pasurive në pronësi të kompanive. Hetimet zbuluan se përmes presioneve, njoftimeve të paligjshme dhe telefonatave kërcënuese ndaj debitorëve dhe familjarëve të tyre, ky grup ka shkaktuar pasoja të mëdha ekonomike dhe sociale. Një numër i madh qytetarësh humbën pasuritë dhe u zhytën në borxhe që tejkalonin vlerën fillestare të kredive të marra. Në kuadër të masave të sigurimit pasuror, SPAK ka sekuestruar: Të gjitha pasuritë e kompanive Micro Credit Albania dhe Final sh.p.k., përfshirë pasuri të paluajtshme e të luajtshme; Rreth 420 milionë lekë dhe 1.3 milionë euro në llogari bankare, depozita dhe bono thesari të të pandehurve. Çështja do të gjykohet nga Gjykata e Posaçme kundër Korrupsionit dhe Krimit të Organizuar. SPAK thekson se kjo është një nga dosjet më të rëndësishme që synon të çmontojë një sistem kriminal të ndërlidhur me sektorin financiar jo-bankë në Shqipëri./Euronews.al/