Specializantët bllokojnë hyrjen e Ministrisë së Shëndetësisë, s’u besojnë më premtimeve (VIDEO)

Një grup i specializantëve që po proteston për tri ditë radhazi para Ministrisë së Shëndetësisë, sot ka bllokuar hyrjen e kësaj ndërtese. Ata kanë tri kërkesa për të cilat po thonë se nuk po u përfillen prej kohësh, raporton Klan Kosova. Sipas tyre, kjo protestë po mbahet në lidhje me mospagesën e kujdestarive prej muajit shkurt dhe kundër detyrimit për të paguar vitin e shkollimit specialistik 500 euro për një vit. Për t’u ballafaquar me protestuesit, te hyrja doli Sekretari i Përgjithëm në Ministrinë e Shëndetësisë, Naim Bardiqi, i cili i sfidoi ata me pyetjen: “A keni me kompenzu këtë mungësë tuajën që jeni këtu sot?”. Bardiqi vazhdoi tutje duke thënë se Ministria e Shëndetësisë do t’i shqyrtojë të gjitha kërkesat e protestuesve dhe mundësitë ligjore në mënyrë që ato të realizohen. Mirëpo specializantët, nuk po u besojnë më premtimeve të ministrisë derisa ato të zyrtarizohen në letër. Doktoresha Kimete Mehmeti i ka thënë Klan Kosovës se premtimet sikur këto të sekretarit Bardiqi i kanë dëgjuar që nga viti 2021. Specializantët paralajmëruan se protesta e tyre do të vazhdojë deri në plotësim të kërkesave të tyre. https://www.youtube.com/watch?v=dM-n2Ov-eUs