Spitali i Vushtrrisë do të zgjerohet, komuna e jep në shfrytëzim ish-objektin e QKMF-së

Pas vizitës së përbashkët në spitalin “Sheikh Zayed” të Vushtrrisë, kryetari i kësaj komune, Ferit Idrizi, dhe ministri i Shëndetësisë, Arben Vitia, kanë bërë të ditur se kapacitetet e këtij spitali do të zgjerohen. Idrizi tha se me kërkesën e Spitalit dhe Shërbimit Spitalor Klinik dhe Universitare të Kosovës, ish-objekti i Qendrës Kryesore të Mjekësisë Familjare në këtë komunë do t’i jepet në shfrytëzim Spitalit për ta zgjeruar infrastrukturën dhe shërbimet e ofruara për qytetarët. Ai shtoi se këtë çështje do ta procedojnë në Komunitete për Politikë dhe Financa dhe në Kuvendin e Komunës, ku sipas tij, do ta ketë një mbështetje të fuqishme. I pari i Vushtrrisë tha se qëllimi kryesor i vizitës ishte që ministri t’i shihte nga afër shërbimet shëndetësore, primare dhe sekondare në Vushtrri, shkruan EkonomiaOnline përcjell Klankosova.tv “Dua ta falënderoj ministrin Vitia që vizitoi komunën e Vushtrrisë. Patëm një takim jashtëzakonisht të frytshëm dhe tani bashkë më të jemi këtu në spitalin ‘Sheikh Zayed’ për një vizitë. Qëllimi i vizitës është për ta parë gjendjen nga afër ministri për komunën e Vushtrrisë , shërbimet shëndetësore, primare dhe sekondare”. “Biseduam rreth ish-objektit të Qendrës kryesore të Mjekësisë Familjare, kërkesë që e ka bërë spitali dhe SHSKUK-ja për ta dhënë në shfrytëzim për ta zgjeruar infrastrukturën në spitalin e Vushtrrisë. Ne shprehëm gatishmërinë që këtë ta procedojmë në Komunitete për Politikë dhe Financa dhe në Kuvendin e Komunës së Vushtrrisë në këtë seancë. Do t’i japim një mbështetje të fuqishme në mënyrë që spitali t’i zgjerojë kapacitet dhe të ofrojë shërbime edhe më të mira”, tha ai. Edhe ministri I Shëndetësisë Arben Vitia, u shpreh se patëm një takim shumë të frytshëm dhe miqësor me kryetarin Idrizi.Ai u nda i kënaqur nga gatishmërinë e kryetarit që t’i përgjigjet pozitivisht kërkesës së spitalit “Sheikh Zayed”, për zgjerimin e kapaciteteve të këtij spitali në një pronë e cila është pronë komunale. Ai tha se rezultate e këtyre takimeve do të përkthehen në shërbime sa më cilësore për qytetarët e komunës së Vushtrrisë. “Ishte një takim sa miqësor, ishte një takim punë më shumë, sepse kryetari ishte shumë ekspeditiv dhe menjëherë e mori përsipër që kërkesën e bërë nga spitali “Sheikh Zayed” dhe nga drejtoresha e spitalit për zgjerimin e kapaciteteve të këtij spitali në një pronë e cila tani është pronë komunale. E mori përsipër që menjëherë ta procedojë këtë gjë në Kuvendin Komunal. Ishte një takim pune jashtëzakonisht i frytshëm, shumë miqësor. E falënderoj për mikpritjen, por mbi të gjitha edhe për punën edhe atë që po e bënë edhe për qytetarët e Vushtrrisë edhe për zgjerimin e kapaciteteve të nivelit sekondar në spitalin në Vushtrri”.“Jemi shumë të sigurtë që më zgjerimin e këtyre hapësirave do të shtohen shërbimet në këtë spital për qytetarët e Vushtrrisë, por natyrisht do të rritet edhe cilësia e këtyre shërbimeve. Nga këto takime ne kuptuam se nuk ka as një arsye që kjo të mos bëhet dhe jam i lumtur që po dal nga ky takim më një energji shumë të mirë, pozitive, por mbi të gjitha me rezultate e këtyre takimeve që do të përkthehen në shërbime sa më cilësore për qytetarët e komunës së Vushtrrisë,” tha Vitia. Drejtoresha e këtij spitali, Shefkije Shatri, falënderoi ministrin dhe kryetarin për mbështetjen e dhënë për këtë spital. “E falënderoj ministrin për kontributin e vazhdueshme që e ka dhënë. Falënderoj edhe kryetarin e komunës që na ka dalur krahë në bashkëpunime dhe presim bashkëpunime edhe në të ardhmen”, tha ajo. *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS.