Stafi shëndetësor i lodhur nga pandemia, rrezikohet mbingarkimi i sistemit shëndetësor

Në kohën kur Kosova po shënon rekord të zi me të infektuar nga Covid-19, Ministria e Shëndetësisë dhe mjekët ju bëjnë thirrje qytetarëve që të ndjekin këshillat e profesionistëve shëndetësorë dhe do të jenë më pak të rrezikuar për t’u prekur nga COVID-19. I pari i Shëndetësisë në vend, Armend Zemaj, bën thirrje për përkushtim të plotë në zbatimin e masave nga qytetarët, në mënyrë që të mos mbingarkohet sistemi shëndetësor. “Përkushtimi i plotë i secili qytetar të mos mbingarkojmë sistemin tonë shëndetësor. Profesionistët shëndetësorë duhet të ndihmohen, t’i zbatojmë masat secili në mënyrën e vet, ta ruajmë shëndetin, ta ruajmë jetën e njëri-tjetrit, ta ruajmë familjen tonë të përbashkët”. Që nga përhapja e koronavirusit, Klinika Infektive është duke punuar pa ndërprerë. Drejtoresha e Klinikës Infektive, Lindita Ajazaj-Berisha, ka kërkuar nga qytetarët në respektimin e masave që dalin nga institucionet, sepse tanimë stafi shëndetësor është i lodhur. “Të nderuar qytetarë Klinika Infektive është 8 muaj që është duke punuar dhe duke u ballafaquar me virusin. Prandaj i gjithë stafi shëndetësorë është tani më i lodhur dhe të vetmen gjë që mund të bëni është të na ndihmoni duke i respektuar të gjitha masat që dalin nga institucionet shëndetësore, duke mbajtur maskën, duke mbajtur distancën, duke mbajtur higjienën personale dhe duke u larguar nga grumbullimet e panevojshme. Virusi është në mesin tonë, ka ekzistuar dhe akoma e ekziston”. “Të gjithë ata të cilët kanë rezultuar pozitiv me Covid-19 duhet të qëndrojnë në shtëpi, ndërsa të gjithë ata të cilët janë të sëmurë dhe kanë probleme me frymëmarrje patjetër që duhet të vizitohen te mjeku dhe sipas rekomandimeve të mjekut duhet të spitalizohen, duke e mbrojtur vetën në të njëjtën kohë mbrojmë edhe familjarët dhe e ndihmojmë stafin shëndetësor në punën 8 mujore”. Një ndër mjekët më të vjetër të kësaj klinike është infektologu Salih Ahmeti. Ai ka treguar komplikimet shëndetësore që shkakton ky virus. Ahmeti ka kërkuar kujdes të shtuar nga qytetarët në këto ditë ku ka shtim të numrit të të infektuarve. “COVID-19 është një sëmundje me manifestime klinike të ndryshme, duke filluar prej formave asimptomatike, pastaj mund të shfaqet në forma të lehta, mesatarisht të rënda, forma të rënda dhe ndonjëherë edhe me forma shumë të rënda të cilat mund të rrezikojnë në mënyrë serioze jetën e pacientit. Pacientët të cilët kanë infeksionin me COVID-19 është e preferueshme që të ju përmbahen sugjerimeve të mjekëve, pacientët me forma mesatarisht të rënda dhe të rënda duhet të lajmërohen sa më shpejtë te mjeku përkatës, në mënyrë që trajtimi të fillojë me kohë dhe të jetë i hershëm”. “Pacientët që kanë temperaturë të lartë, kollë të thatë dhe rënie të oksigjenit nën 93% patjetër që duhet të kërkojnë ndihmë mjekësore te specialistët infektolog apo pulmolog në mënyrë që komplikimet e sëmundjes të ndërpriten më shpejtë”. “Këto ditë ku mund të ballafaqohemi me shtim të numrit të rasteve sidomos në muajt e ftoft të vitit, të respektojnë në mënyrë sa më rigoroze mbajtjen e maskave, ruajtjen e distancës fizike dhe të ikin nga tubimet e panevojshme”. Edhe, infektologu Shemsedin Dreshaj ka bërë apel që qytetarët të ruajnë veten, në mënyrë që profesionistët shëndetësor të jenë të gatshëm për të ofruar ndihmë. “Koha në të cilën jetojmë, nuk është kohë për të neglizhuar problemin me të cilin jemi duke u ballafaquar. Korona është rrezik, ju lutem respektoni distancën, ju lutem mbani maskat për shkak se jemi lodhur në mision që shtatë muaj pa ndërprerë pa asnjë ditë pushimi. Ruani veten dhe na mundësoni neve që të ju ofrojmë ndihmën që jemi të gatshëm të ju ofrojmë”. Studime të ndryshme ndërkombëtare kanë dëshmuar se pacientëve me COVID-19 u nevojiten disa muaj që të rimarrin energjinë e duhur. Dhomat e Klinikës Infektive të Qendrës Klinike Universitare të Kosovës, janë bërë si shtëpi e dytë për të infektuarit që janë të shtrirë në këtë klinikë. Një paciente tash e tre javë së bashku me prindërit e saj janë të shtrirë në Klinikën Infektive. Ajo tregon se përgjatë këtyre javëve të tre kishin simptoma të ndryshme. “Koronavirusi është shumë i vërtet, nëse se keni besuar që edhe një rast tjetër për me besuar më shumë. Ne jemi tre familjarë unë dhe prindërit të shtrirë që dy javë në Klinikën Infektive të QKUK-së, të tretë kemi simptome të ndryshme, të tre kemi terapi të ndryshme, fatmirësisht unë e kam kaluar më lehtë, por babi dhe nëna ime nuk janë tu e kaluar edhe aq lehtë, po shpresojmë në rikuperim. Mirëpo për mos me mbërri deri të kjo pikë ju lutem kini kujdes, mbani maskat, dezinfektoni duart dhe ruani të afërmit e juaj sa më shumë që mundeni”. Tash e tre javë që është duke u ballafaquar me koronavirusin, njëri prej pacientëve nuk harron t’i falënderoj edhe stafin e Klinikës Infektive për përkushtimin e përkujdesni ndaj tyre. “Nuk ka vend për diskutim se a duhet besuar, apo mos besuar virusin. Virusi ekziston dhe është tejet i rëndë, nevojitet kujdes sepse ai thjesht nuk e di kah të vjen, edhe nëse të vjen i ka goditjet e rënda. Unë jam gati që tri javë këtu në spital, në një përkujdesje vërtet të madhe, dhe mund të them se është zhvilluar vërtet një luftë e ashpër e mjekësisë këtu me virusin. Jam mirënjohës gjithë stafit të klinikës për përkushtimin e përkujdesin që po më duke se po ja dalim ta luftojmë këtë virus. Rekomandimi im do të ishte që të kenë kujdes maksimal, të ruhen sa më shumë”./EO