Stuhia “Melissa” kërcënon Karaibet, një i vdekur në Haiti

Një burrë i moshuar ka humbur jetën në Haiti si pasojë e stuhisë tropikale “Melissa”, e cila pritet të fuqizohet në uragan gjatë fundjavës. Stuhia tropikale “Melissa” po kalon përmes Karaibeve Qendrore, ndërsa meteorologët paralajmërojnë se ajo mund të forcohet ndjeshëm dhe të prekë brigjet e Xhamajkës si një uragan i fuqishëm, duke shkaktuar përmbytje dhe rrëshqitje të rrezikshme të dheut në jug të Haitit, raporton Aljazeera, transmeton Klankosova.tv. Sipas Qendrës Kombëtare të Uraganeve në Shtetet e Bashkuara (NHC), qendra e stuhisë ndodhej të premten rreth 245 kilometra në juglindje të Kingstonit, Xhamajkë, dhe 430 kilometra në jugperëndim të Haitit. Meteorologët paralajmërojnë reshje të dendura shiu në Xhamajkë, Haitin jugor dhe Republikën Domenikane gjatë fundjavës, ndërsa stuhia pritet të arrijë forcën e një uragani të kategorisë së katërt deri të martën e ardhshme. Autoritetet në Haiti raportuan se një pemë e rrëzuar nga era vrau një burrë të moshuar në qytetin bregdetar të Marigotit në jug të vendit, ndërsa pesë persona të tjerë u plagosën nga përmbytjet në rajonin e Artibonit. Agjencia e Mbrojtjes Civile njoftoi se po monitoron situatën dhe u bëri thirrje qytetarëve të shmangin zonat malore dhe bregdetare. Organizata e Kombeve të Bashkuara ka bërë të ditur se po përgatit më shumë se 100 strehimore emergjente në rajonin jugor të Haitit, i cili mbetet tepër i cenueshëm për shkak të erozionit, varfërisë, dhunës së armatosur dhe mungesës së infrastrukturës.