Sveçla, Pacolli e Zyba, me zor në gjykatë? (VIDEO)

Shumica e ish-deputetëve e zyrtarëve të Vetëvendosjes, disa nga të cilët janë edhe aktualisht pjesë e Parlamentit të shtetit, që akuzohen për hedhje të gazit lotsjellës në Kuvendin e Kosovës më 21 mars 2018 në Kuvend, nuk u paraqitën të martën në seancën e caktuar nga Gjykata Themelore. Përjashtim bëri Drita Millaku, e cila në ndërkohë kishte lënë VV-në për të kaluar në LDK. Avokatët mbrojtës të Xhelal Sveçlës, Fitore Pacollit e Salih Zybës, thanë se nuk e dinë pse klientët e tyre nuk u paraqitën në këtë sallë, raporton Klan Kosova. Pak para përfundimit të kësaj seance, që nuk zgjati shumë, gjyqtari Sabit Sadikaj bëri me dije se për herën tjetër, të akuzuarit duhet të sillen me forcë, nëse nuk vijnë vullnetarisht. Në seancën e kaluar që u mbajt më 22 korrik, ish-deputetët qenë të pranishëm në sallë, por atë ditë mungoi prokurori i rastit Valdrin Krasniqi. Në këtë rast, deputetët e anëtarët e Vetëvendosjes patën kërkuar të dinë se si do të sigurohet prania e atij që e mbron aktakuzën. Aktakuza ndaj këtyre personave u ngrit më 26 korrik 2019, pasi, sipas Prokurorisë, hedhja e gazit lotsjellës nga ta, pengoi vazhdimin e seancës së Kuvendit, duke detyruar deputetët të largoheshin nga salla. Për këtë, Sveçla, Millaku, Pacolli e Zyba ngarkohen për Pengim të personit zyrtar. Akuzat ndaj tyre mbështeten në incizime, raporte policore, foto-dokumentacion dhe vendimin e Kryesisë së Kuvendit për ndërprerjen e seancës së 21 marsit 2018. /Klankosova.tv https://www.youtube.com/watch?v=AdXzQpvmQY8