Tentim plaçkitja në Breg të Diellit: Çka u sekuestrua në vendin e ngjarjes?

Një tentim grabitje e armatosur ka ndodhur të hënën rreth orës 13:58 në rrugën “Xheladin Hana” në kryeqytet, ku dy persona të maskuar kanë provuar të sulmojnë një automjet për transportimin e parave. Sipas informatave zyrtare, të dyshuarit kanë qenë të armatosur me armë zjarri dhe kanë tentuar të realizojnë grabitjen, por pa arritur të marrin ndonjë shumë parash. Në vendin e ngjarjes policia ka sekuestruar një predhë të armës së zjarrit, e cila dyshohet se është shkrepur gjatë tentimit për plaçkitje, transmeton Klankosova.tv. Ngjarja është raportuar menjëherë tek organet e rendit, ndërsa prokurori i shtetit është njoftuar dhe ka autorizuar veprimet e mëtejshme hetimore. Rasti po hetohet nga njësitet kompetente të Policisë së Kosovës, ndërsa hetimet vazhdojnë për identifikimin dhe arrestimin e të dyshuarve. Lidhur me rastin, gjatë ditës së hënë ka raportuar edhe Klankosova.tv. Zëdhënësja e Prokurorisë, Kaltrina Shala kishte konfirmuar për redaksinë se të dyshuarit ishin ende në arrati. “Në lagjen Bregu i Diellit ka ndodhur një grabitje në tentativë, dhe kryerësit e veprës janë ende në arrati. Prokurori i shtetit, së bashku me njësi të tjera relevante, janë duke ndërmarrë të gjitha masat dhe veprimet e nevojshme hetimore për arrestimin e personave të dyshuar për veprën penale “Grabitje në tentativë” në bazë të nenit 317 lidhur me nenin 28, si dhe për “Mbajtjen në pronësi, kontroll ose posedim të paautorizuar të armëve” sipas nenit 366 të KPRK-së. Për çdo zhvillim të ri do të njoftojmë në kohë”, njoftoi Prokuroria. Rasti ishte konfirmuar për Klankosova.tv edhe nga zëdhënësi i Policisë për kryeqytetin, Enis Pllana. Ai kishte bërë të ditur se fatmirësisht, si pasojë e të shtënave me armë, nuk kishte persona të lënduar. “Rreth orës 14:00, kemi pranuar informatën për të shtëna me armë në lagjen Bregu i Diellit në Prishtinë. Bazuar në të dhënat e deritanishme, rasti dyshohet se ka ndodhur gjatë një grabitjeje të armatosur ndaj pjesëtarëve që po siguronin një furgon që transportonte para”. “Nga informatat fillestare nuk raportohet për persona të lënduar, ndërkohë që hetuesit policorë në koordinim me Prokurorinë, janë duke ndërmarrë të gjitha masat e nevojshme për identifikimin dhe arrestimin e të dyshuarve si dhe për zbardhjen e plotë të rrethanave të rastit”, tha Pllana. https://klankosova.tv/te-shtena-me-arme-dhe-plackitje-ne-furgonin-qe-transportonte-para-ne-breg-te-diellit111/ https://klankosova.tv/tentim-grabitja-ne-breg-te-diellit-te-dyshuarit-ende-ne-arrati/