Thirrje për drejtësi pas vrasjes së kryebashkiakut në Meksikë gjatë festivalit “Dita e të Vdekurve”

Banorët e qytetit Uruapan në Meksikë, në shtetin perëndimor të Michoacan, kanë dalë në rrugë për të kërkuar drejtësi pas vrasjes së kryebashkiakut Carlos Manzo, një kritik i hapur i krimit të organizuar. Manzo u qëllua për vdekje të shtunën në mbrëmje, gjatë një aktiviteti publik të mbajtur me rastin e festës tradicionale “Dita e të Vdekurve”. Qindra qytetarë, të veshur në të zeza, morën pjesë në procesionin funeral të kryebashkiakut 40-vjeçar, duke brohoritur “Drejtësi! Drejtësi! Jashtë Morena!”, në shenjë proteste ndaj partisë në pushtet të presidentes Claudia Sheinbaum. Sipas autoriteteve, Manzo u qëllua shtatë herë nga një person i armatosur, i cili u vra në vendngjarje nga forcat e sigurisë. Në sulm mbetën të plagosur edhe një anëtar i këshillit bashkiak dhe një truprojë, raporton Aljazeera, transmeton Klankosova.tv. Ministri Federal i Sigurisë, Omar Garcia Harfuch, deklaroi se arma e përdorur në atentat lidhet me dy përleshje të mëparshme mes grupeve kriminale në rajon. Ai theksoi se “asnjë pistë nuk përjashtohet për zbardhjen e këtij akti të ulët”. Presidentja Sheinbaum e quajti vrasjen “të neveritshme” dhe premtoi se do të ketë “drejtësi të plotë dhe asnjë tolerancë ndaj pandëshkueshmërisë”. Carlos Manzo ishte zgjedhur kryebashkiak i Uruapan-it në shtator 2024 dhe kishte paralajmëruar disa herë për kërcënimet ndaj jetës së tij. Në një intervistë në shtator, ai kishte thënë: “Nuk dua të jem thjesht një tjetër kryebashkiak në listën e atyre që janë ekzekutuar”. Qyteti Uruapan njihet si “kryeqyteti i avokados” në Meksikë, por industria fitimprurëse e këtij fruti është bërë shënjestër e grupeve të krimit të organizuar që kërkojnë kontroll mbi tregtinë. Sipas autoriteteve, Manzo ishte nën mbrojtje që nga dhjetori 2024, me ndihmën e policisë bashkiake dhe të Gardës Kombëtare.