Tom Brady dhe Gisele Bündchen kanë punësuar avokatë divorci

Tom Brady dhe Gisele Bündchen, të cilët kanë jetuar të ndarë nga njëri-tjetri javët e fundit, kanë punësuar secili avokatë divorci dhe po “eksplorojnë opsionet” në lidhje me martesën e tyre, tha për CNN një burim i afërt me çiftin e ndarë. CNN raportoi muajin e kaluar se Brady, qendërmbrojtësi shtatë herë kampion i Super Bowl, i cili aktualisht luan për Tampa Bay Buccaneers, dhe gruaja e tij, Bündchen, modele mode, janë marrë me "çështje martesore". Ata u martuan në vitin 2009, ndërsa kanë "jetuar të ndarë", tha një burim i afërt me Bündchen për CNN në shtator, transmeton Klan Kosova. Brady, 45 vjeç, ishte tërhequr nga NFL në shkurt, vetëm për ta anuluar më vonë atë vendim. Ai mori një pushim 11-ditor nga kampi stërvitor në gusht për t'u "marrë me gjëra personale", sipas trajnerit të tij, Todd Bowles. Në një intervistë me revistën Elle të botuar muajin e kaluar, Bündchen tha se kishte "shqetësime" për kthimin e bashkëshortit të saj në fushë pasi fillimisht doli në pension dimrin e kaluar. “Ky është një sport shumë i dhunshëm dhe unë kam fëmijët e mi dhe do të doja që ai të ishte më i pranishëm”, tha Bündchen për revistën. “Patjetër që i kam pasur ato biseda me të pa pushim. Por në fund të fundit, unë mendoj se të gjithë duhet të marrin një vendim që funksionon për ta. Ai gjithashtu duhet të ndjekë gëzimin e tij”. Në një bisedë të fundit në podkastin e tij, Brady foli për disa nga kostot personale të të luajturit në NFL për dy dekada. “Unë nuk kam pasur Krishtlindje dhe Ditë Falënderimi për 23 vjet, nuk kam festuar ditëlindje me njerëz që i dua, që kanë lindur nga gushti deri në fund të janarit. Dhe unë nuk jam në gjendje të jem në funerale dhe nuk jam në gjendje të jem prezent në dasma", tha Brady. “Mendoj se vjen një moment në jetën tënde ku thua: ‘E di çfarë? Unë e kam bërë timen dhe është e mjaftueshme dhe kohë për të vazhduar, për të kaluar në pjesë të tjera të jetës”.