Tre policë u goditën nga motoçiklistët në Ferizaj, dalin detajet

Tre zyrtarë policorë janë lënduar të martën mbrëma në rrugën “Gjon Sereqi” në Ferizaj, si pasojë e goditjes nga tre motoçiklistë që nuk i respektuan rregullat e trafikut. Mbrëmë Klankosova.tv ka raportuar për arrestimin e të rinjve afër nënkalimit të qytetit. Një lexues kishte dërguar pamje nga vendi i ngjarjes ku shihen të njëjtit, duke u arrestuar. Sipas raportit 24-orësh të policisë, rasti i parë ndodhi rreth orës 21:15, kur një motoçiklist refuzoi të ndalonte për kontroll policor, rriti shpejtësinë dhe goditi dy zyrtarë policorë. Të lënduarit u dërguan menjëherë në Emergjencën e Spitalit të Ferizajt për trajtim mjekësor. Policia njofton se i dyshuari është identifikuar pasi në vendin e ngjarjes i kishte rënë telefoni celular. Më vonë, ai së bashku me prindin e tij është paraqitur në stacionin policor. Pas intervistimit, me urdhër të prokurorit kujdestar, i dyshuari është liruar në procedurë të rregullt. Pak minuta më vonë, rreth orës 21:20, një tjetër incident ndodhi kur dy motoçiklistë tjerë përplasën një zyrtar tjetër policor, duke i shkaktuar lëndime trupore. Të dy të dyshuarit u arrestuan në vendngjarje dhe, pas intervistimit, u liruan në procedurë të rregullt me urdhër të prokurorit kujdestar. /Klankosova.tv https://klankosova.tv/skena-dramatike-te-nenkalimi-ne-ferizaj-momenti-kur-policia-prangos-motoristet-video-1/