Trump kërcënon me ndërprerjen e programeve të demokratëve, garanton fonde për ushtrinë

Presidenti Donald Trump ka kërcënuar sërish se do të ndërpresë financimin për disa prej programeve të cilat ai i cilëson si “programe të demokratëve”, ndërsa paralajmëron mbështetje të vazhdueshme për sektorin ushtarak, në një kohë kur mbyllja e qeverisë federale ka hyrë në ditën e saj të 15-të. “Demokratët po humbin nga kjo mbyllje sepse po mbyllen programet që ata i mbështesnin, dhe shumë prej tyre nuk do të rikthehen më,” tha Trump. Sipas Shtëpisë së Bardhë, një listë zyrtare e programeve që do të preken pritet të publikohet të premten. Trump shtoi se “programet republikane” nuk do të preken nga shkurtimet. Qeveria amerikane ka nisur tashmë ndërprerjen e disa financimeve, duke përfshirë 28 miliardë dollarë për projekte infrastrukturore dhe energjie në shtete të drejtuara nga demokratët, si Kalifornia, Ilinoi dhe Nju Jorku. Gjithashtu, rreth 4.200 punonjës federalë nga tetë agjenci qeveritare kanë marrë njoftime për shkurtim të pozicioneve të punës. Shkurtimet më të mëdha janë bërë në Departamentin e Thesarit, në Departamentin e Shëndetësisë dhe Shërbimeve Njerëzore dhe në Qendrat për Kontrollin e Sëmundjeve (CDC). Ndër programet që mund të mbyllen përfshihen edhe ato që më parë kanë pasur mbështetje të dyanshme, si fondi i zhvillimit për komunitetet me të ardhura të ulëta që administrohet nga Departamenti i Thesarit. Aktualisht, SHBA ka rreth 2.25 milionë punonjës civilë federalë, nga të cilët rreth 60% punojnë në Departamentin e Mbrojtjes, në atë të Çështjeve të Veteranëve dhe në Sigurinë Kombëtare. Shtëpia e Bardhë ka njoftuar se do të riadresojë 8 miliardë dollarë nga fondet ekzistuese për të siguruar pagesat për ushtrinë dhe rojen bregdetare, një hap jo i zakonshëm gjatë një mbylljeje të tillë. Ndërkohë, Senati amerikan mbetet i bllokuar sa i përket miratimit të projektbuxhetit për të zgjidhur krizën. Projektligji i propozuar nga republikanët për të zgjatur financimin deri më 21 nëntor dështoi të kalojë të hënën, duke marrë vetëm 49 vota nga 60 të nevojshme.