Trumpi thotë se Tajlanda dhe Kamboxhia janë pajtuar t'i ndalin luftimet

Presidenti amerikan Donald Trump, ka thënë se kryeministrat e Tajlandës dhe Kamboxhias do të ndalojnë luftimet "në mënyrë efektive këtë mbrëmje". Trumpi e bëri njoftimin pas bisedave telefonike me të dy udhëheqësit pas përleshjeve vdekjeprurëse kufitare në ditët e fundit, të cilat kanë lënë të paktën 20 të vdekur dhe gjysmë milioni të zhvendosur. As kryeministri tajlandez Anutin Charnvirakul dhe as homologu i tij kamboxhian Hun Manet nuk kanë komentuar, raporton BBC, transmeton Klankosova.tv. Megjithatë, pas telefonatës së tij me Trump më parë, Charnvirakul tha në një konferencë për shtyp se një armëpushim do të arrihet vetëm nëse "Kamboxhia do të pushojë së zjarri, do të tërheqë trupat e saj, do të heqë të gjitha minat tokësore që ka vendosur". Në një postim në platformën e tij të mediave sociale Truth Social, Trump tha se të dy udhëheqësit "kanë rënë dakord të NDËRPREJNË të gjitha të shtënat", "Të dyja vendet janë gati për PAQE dhe për tregti të vazhdueshme me Shtetet e Bashkuara të Amerikës". Mosmarrëveshja e gjatë kufitare u përshkallëzua më 24 korrik, ndërsa Kamboxhia nisi një breshëri raketash në Tajlandë, e cila u përgjigj me sulme ajrore. Pas ditësh luftimesh intensive që lanë dhjetëra të vdekur, vendet fqinje të Azisë Juglindore ranë dakord për një "armëpushim të menjëhershëm dhe pa kushte" të ndërmjetësuar nga Trump dhe kryeministri malajzian Anwar Ibrahim. Që atëherë, tensionet vazhduan të shtoheshin. Këtë javë, dhuna u zgjerua në të paktën gjashtë provinca në Tajlandën verilindore dhe pesë provinca në veri dhe veriperëndim të Kamboxhias. Të dy vendet kanë kontestuar sovranitetin territorial përgjatë kufirit të tyre tokësor prej 800 km për më shumë se një shekull, që kur kufijtë e dy kombeve u hartuan pas pushtimit francez të Kamboxhias.