Turisti gjerman ndihmohet në Valbonë, pasi u lëndua gjatë eksplorimit

Policia e Shtetit ka bërë të ditur se rreth orës 13:15 e kanë pranuar një informacion se në “Majën e Rosit” në Valbonë një turist gjerman ishte rrëzuar dhe kishte lënduar këmbën. Në njoftimin e lëshuar për media thuhet se policia i doli në ndihmë dhe i njëjti është duke marrë tretman mjekësorë në Spitalin e Tropojës dhe është jashtë rrezikut për jetë. “Menjëherë pas marrjes së njoftimit, shërbimet e Komisariatit të Policisë Tropojë së bashku me ekipin mjekësor të spitalit të Tropojës, janë nisur drejt adresës së dhënë”. “Pas dy orësh kërkimesh shërbimet e Policisë, lokalizuan turistin gjerman 68 vjeçar, i cili u transportua nga shërbimet e Policisë deri në rrugën e makinave dhe më pas u transportua drejt spitalit me autoambulancë. Turisti ndodhet në Spitalin e Tropojë, jashtë rrezikut për jetën”, thuhet në njoftim. /Klankosova.tv