“U detyrova të shkoj në Afrikë për shkollimin e fëmijëve”, rrëfimi i anesteziologut që la QKUK-në (VIDEO)

Ikja e profesionistëve shëndetësorë nga vendi është një alarm për gjendjen aktuale dhe të ardhmen e shëndetësisë në vend. KIKS Kosova sonte ka trajtuar këtë temë dhe mbylljen e qendrave e ambulancave të mjekësisë familjare, si pasojë e këtij fenomeni, raporton Klan Kosova. Në mesin e atyre që u detyruan të largohen nga vendi, si pasojë e kushteve financiare, është edhe anesteziologu Gëzim Kunoviku. Në një intervistë ekskluzive për Kiksin, Kunoviku ka rrëfyer sfidat dhe vështirësitë për të braktisur gjithçka në Kosovë, me qëllimin e vetëm që t’u sigurojë katër fëmijëve të tij shkollimin e duhur. Kunoviku, i cili ndodhet në zonën e Mogadishut, zonë lufte në Afrikë, ka treguar që rroga prej 650 eurosh që e merrte në QKUK, ishte e pamjaftueshme për mbijetesë në Kosovë. Andaj, kjo thotë se e detyroi që të linte gjithçka pas vetes për një punë të përkohshme në Afrikë. Megjithatë, Kunoviku, i cili është edhe rezervist i Forcës së Sigurisë së Kosovës, thotë se familja e tij e ka ndjerë mungesën e tij edhe kur ai ishte në Kosovë, pasi që detyrohej të punonte edhe në sektorin privat, në mënyrë që atyre të mos u mungonte asgjë. “Para pesë ditëve më kontaktoi vajza ime 12-vjeçare dhe më tha: ‘A do ta gjesh një punë që punon më pak?’. Kjo nënkupton se edhe kur kam qenë në Kosovë, nuk kam qenë i pranishëm në jetën e tyre”, tha ndër të tjera ai, raporton Klan Kosova. Kunoviku u ka bërë thirrje institucioneve të Kosovës që të marrin masa emergjente për ndalimin e ikjes së profesionistëve shëndetësorë jashtë vendit, pasi që në të kundërtën vendi mund të vijë në një situatë ku do të detyrohen të marrin kuadro mjekësore nga vendet e Lindjes. /Klankosova.tv https://youtu.be/xhlbWPjCzcM