U gjet i vdekur dy vjet më parë, varroset sot ish-ushtari i UÇK-së, Samir Puza

Sot do të varroset ish-ushtari i UÇK-së, Samir Puza, i cili u gjet i vdekur më 1 mars të vitit 2024 në një pusetë në Parkun “Karagaq” Pejë. Këtë e ka bërë të ditur familja e të ndjerit, derisa u bë e ditur se ai do të varroset me nderime ushtarake në varrezat e veteranëve të Ushtrisë Çlirimtare të Kosovës në “Kompleksin Memorial në Koshare” nga ora 14:00, transmeton Klankosova.tv. Ndërkohë, përfaqësuesi ligjor i familjes Puza, avokati Granit Cenaj deklaroi rasti i zhdukjes dhe i vdekjes së Samirit, është hetuar nga Prokuroria Themelore në Pejë dhe deri në këtë moment, sipas tij, nuk ka asnjë epilog të qartë se çfarë ka ndodhur me të ndjerin. “Konkretisht se a është një vrasje pa autor apo është një vdekje natyrale e shkaktuar si pasojë e vdekjes së natyrshme”, ka thënë Cenaj. Ai shton se në bazë të të gjeturave (kamerave të sigurisë, dëshmitarëve etj) Prokuroria nuk ka arritur që të ndërlidhë këtë rast me ndonjë autor apo ngjarje tjetër konkrete. Sipas ekspertimit mjekoligjor të datës 06.09.2024 rezulton se shkaku i vdekjes së Samir Puzës është i “pa përcaktuar” e gjithashtu edhe mënyra e vdekjes është e “pa përcaktuar”.