U vodh në Suedi e u çmontua në Fushë-Kosovë – “Porsche” rikthehet në gjendjen e mëparshme (VIDEO)

Pronarin e kishte mijëra kilometra larg, në Suedi. Por, një veturë e tipit “Porsche”, përfundoi tek një kosovar në Fushë-Kosovë. Ky i fundit e bleu prej një burri nga shtetit nordik. Makina ishte shpallur në kërkim ndërkombëtar nga Interpoli si e vjedhur, derisa u lokalizua në Sllatinë një autoservis. Ajo ishte demoluar, pasi pjesë të saj ishin hequr e i ishin vendosur një tjetre të po të njëjtës markë. Megjithatë, pas intervenimit nga organet e rendit, automjeti është rikthyer në gjendjen e mëparshme, raporton Klan Kosova. Nga autoservisi që punoi në veturë nuk pranuan të flasin rreth rastit, me arsyetimin se nuk kishin njohuri se ajo ishte e vjedhur. Derisa burri i dyshuar për këtë rast është intervistuar dhe është liruar në procedurë të rregullt. “Me t’u lokalizuar kjo veturë janë ndërmarrë të gjitha masat e nevojshme në koordinim të plotë me policinë e Kosovës. Me urdhër të prokurorit vetura është sekuestruar përkohësisht deri në një vendim tjetër të radhës”, tha Laureta Ulaj, zëdhënëse e Prokurorisë Themelore të Prishtinës. Televizioni merr vesh se i dyshuari kishte njohuri se makina ishte e vjedhur kur e bleu atë. Derisa policia kosovare ishte njoftuar nga autoritetet e shtetit suedez se ajo po qarkullonte në shtetin ballkanik. Ndërkaq, prokuroria ka filluar procedurat për dërgimin e saj në vendin e origjinës, nëpërmjet Agjencisë për Administrimin e Pasurisë së Sekuestruar ose Konfiskuar. /Klankosova.tv https://youtu.be/jUqcARr1T6U *Klikoni KËTU për t’u bërë pjesë e kanalit zyrtar të Klan Kosovës në Viber. *Klikoni KËTU për ta shkarkuar aplikacionin e Klan Kosovës në Android, dhe KËTU për iOS.